tark-e-ulfat mein koi yakta na tha

tark-e-ulfat meñ koī yaktā na thā

maiñ akelā thā magar tanhā na thā

baaġh thā lekin tirā chehrā na thā

ḳhema-e-gul meñ koī rahtā na thā

jis mohabbat se tirī shohrat huī

is meñ shāyad kuchh tirā hissa na thā

dil ko vīrāñ kar gayā zehnī shu.ūr

dard thā par dard kā yaarā na thā

kuchh mire kirdār meñ likkhā thā ġham

kuchh mirā radd-e-amal bejā na thā

ghar banā leñge kisī bastī meñ aur

ham ne is maqsad se ghar chhoḌā na thā

dostī par jis kī mujh ko naaz ho

dost merā ek bhī aisā na thā

husn terā umr-bhar likhte rahe

sher merā ek bhī tujh sā na thā

muddatoñ maiñ ne shikāyat tak na kī

muddatoñ vo mere paas aatā na thā

ab to har ik dost kā kahnā paḌā

mujh se behtar thā magar mujh sā na thā

jis ko dohrātā rahā barsoñ 'munīr'

us ke apne dard kā qissa na thā

tark-e-ulfat mein koi yakta na tha

main akela tha magar tanha na tha

bagh tha lekin tera chehra na tha

KHema-e-gul mein koi rahta na tha

jis mohabbat se teri shohrat hui

is mein shayad kuchh tera hissa na tha

dil ko viran kar gaya zehni shuur

dard tha par dard ka yara na tha

kuchh mere kirdar mein likkha tha gham

kuchh mera radd-e-amal beja na tha

ghar bana lenge kisi basti mein aur

hum ne is maqsad se ghar chhoDa na tha

dosti par jis ki mujh ko naz ho

dost mera ek bhi aisa na tha

husn tera umr-bhar likhte rahe

sher mera ek bhi tujh sa na tha

muddaton main ne shikayat tak na ki

muddaton wo mere pas aata na tha

ab to har ek dost ka kahna paDa

mujh se behtar tha magar mujh sa na tha

jis ko dohraata raha barson 'munir'

us ke apne dard ka qissa na tha