tark-e-wafa ka shikwa mat kar ulfat ka iqrar na mang

tark-e-vafā kā shikva mat kar ulfat kā iqrār na maañg

ġhair to āḳhir ġhair hai us se apnoñ jaisā pyaar na maañg

bātil ke parvānoñ se haq-goī kī ummīd na kar

patthar dil rakhne vāloñ se hamdardī ke haar na maañg

maañ ke duudh kā qarz chukānā hai to paḌhne jā schōl

nanhe nanhe in hāthoñ meñ thaam qalam talvār na maañg

pyaar ke sachche phūloñ ko mahkāne kī tadbīreñ kar

jin meñ nafrat ke phal aate hoñ aise ashjār na maañg

chhoTī chhoTī bātoñ par yuuñ barham honā Thiik nahīñ

mujh se apne pyaar kā tohfa vāpas mere yaar na maañg

maiñ terā chhoTā bhaa.ī huuñ chāhe ye taslīm na kar

lekin is ghar ke āñgan meñ nafrat kī dīvār na maañg

apnī mahrūmī ke ehsāsāt rulā bhī sakte haiñ

is ke dāman meñ kāñTe hī kāñTe haiñ gulzār na maañg

maiñ bhī apnī laḳht-e-jigar ke saare qarz adā kar duuñ

tū bhī apne beTe kī shādī meñ motor car na maañg

ḳhvāboñ kī duniyā meñ pal do pal rahnā hī achchhā hai

saarī umr basar karne ko sapnoñ kā sansār na maañg

pākīza fikroñ ke zevar jin ke tan kī zīnat haiñ

fan kī un do-shīzāoñ se uryānī zinhār na maañg

duniyā bhar kī jhūTī ḳhabreñ din bhar tū paḌh saktā hai

shaam savere qurāñ paḌh le añgrezī aḳhbār na maañg

jis se terā naam ho raushan ḳhud kar aise kaam 'shafī.a'

jhūTī shohrat kī ḳhātir kam-zarfoñ se dastār na maañg

tark-e-wafa ka shikwa mat kar ulfat ka iqrar na mang

ghair to aaKHir ghair hai us se apnon jaisa pyar na mang

baatil ke parwanon se haq-goi ki ummid na kar

patthar dil rakhne walon se hamdardi ke haar na mang

man ke dudh ka qarz chukana hai to paDhne ja school

nanhe nanhe in hathon mein tham qalam talwar na mang

pyar ke sachche phulon ko mahkane ki tadbiren kar

jin mein nafrat ke phal aate hon aise ashjar na mang

chhoTi chhoTi baaton par yun barham hona Thik nahin

mujh se apne pyar ka tohfa wapas mere yar na mang

main tera chhoTa bhai hun chahe ye taslim na kar

lekin is ghar ke aangan mein nafrat ki diwar na mang

apni mahrumi ke ehsasat rula bhi sakte hain

is ke daman mein kanTe hi kanTe hain gulzar na mang

main bhi apni laKHt-e-jigar ke sare qarz ada kar dun

tu bhi apne beTe ki shadi mein motor car na mang

KHwabon ki duniya mein pal do pal rahna hi achchha hai

sari umr basar karne ko sapnon ka sansar na mang

pakiza fikron ke zewar jin ke tan ki zinat hain

fan ki un do-shizaon se uryani zinhaar na mang

duniya bhar ki jhuTi KHabren din bhar tu paDh sakta hai

sham sawere quran paDh le angrezi aKHbar na mang

jis se tera nam ho raushan KHud kar aise kaam 'shafia'

jhuTi shohrat ki KHatir kam-zarfon se dastar na mang