tasawwur mein mere kaba na ab but-KHana aata hai

tasavvur meñ mire ka.aba na ab but-ḳhāna aatā hai

nazar har samt mujh ko jalva-e-jānāna aatā hai

huā huuñ aisā be-ḳhud ik but-e-kāfir kī ulfat meñ

ki ka.abe meñ bhī ab mujh ko nazar but-ḳhāna aatā hai

haqīqat meñ numūd-e-husn hī hai ishq kā baa.is

numā.ish husn kī hotī hai jab parvāna aatā hai

ye duniyā-e-mohabbat bhī ilāhī kaisī bastī hai

jo aatā hai yahāñ vo hosh se begāna aatā hai

garebāñ chaak dāman purza purza ḳhāk-ālūda

na.ī saj-dhaj nirālī shaan se dīvāna aatā hai

shab-e-ġham maut aatī hai na vo aate haiñ ai 'fāzil'

laboñ par dam nikal jaane ko betābāna aatā hai

tasawwur mein mere kaba na ab but-KHana aata hai

nazar har samt mujh ko jalwa-e-jaanana aata hai

hua hun aisa be-KHud ek but-e-kafir ki ulfat mein

ki kabe mein bhi ab mujh ko nazar but-KHana aata hai

haqiqat mein numud-e-husn hi hai ishq ka bais

numaish husn ki hoti hai jab parwana aata hai

ye duniya-e-mohabbat bhi ilahi kaisi basti hai

jo aata hai yahan wo hosh se begana aata hai

gareban chaak daman purza purza KHak-aluda

nai saj-dhaj nirali shan se diwana aata hai

shab-e-gham maut aati hai na wo aate hain ai 'fazil'

labon par dam nikal jaane ko betabana aata hai