tasawwur mein saja kar KHushnuma taswir rakhte hain

tasavvur meñ sajā kar ḳhushnumā tasvīr rakhte haiñ

ham apne ḳhvāb kī dahlīz pe tā۔bīr rakhte haiñ

banī hai kis tarah jannat jahannum ik nazar dekho

tumhāre sāmne ham vādī-e-kashmīr rakhte haiñ

vo sarkash hai agar mauqa mile fitna khaḌā kar de

ham apne nafs ko pā-basta-e-zanjīr rakhte haiñ

hai apnā har amal taqdīr kī āñdhī se sharminda

agarche ham jalā kar mash.al-e-tadbīr rakhte haiñ

giregī bil-yaqīñ sar par kisī din chhat masā.ib kī

agar ham hausloñ ke khokhle shahtīr rakhte haiñ

makīn-e-qasr ho kar tum sukūn-e-dil nahīñ rakhte

yahāñ ham ho ke be-ghar chain kī jāgīr rakhte haiñ

kisī ke dil meñ kyā hai chehre se zāhir nahīñ hotā

vo andar aur bāhar muḳhtalif tasvīr rakhte haiñ

zamāna atomī hathiyār se hai lais lekin ham

gharoñ meñ zang-ālūda vahī shamshīr rakhte haiñ

hameñ kotāh-fahmī ek pal bhātī nahīñ 'ahsan'

hamārī soch raushan hai bahut tanvīr rakhte haiñ

tasawwur mein saja kar KHushnuma taswir rakhte hain

hum apne KHwab ki dahliz pe ta۔bir rakhte hain

bani hai kis tarah jannat jahannum ek nazar dekho

tumhaare samne hum wadi-e-kashmir rakhte hain

wo sarkash hai agar mauqa mile fitna khaDa kar de

hum apne nafs ko pa-basta-e-zanjir rakhte hain

hai apna har amal taqdir ki aandhi se sharminda

agarche hum jala kar mashal-e-tadbir rakhte hain

giregi bil-yaqin sar par kisi din chhat masaib ki

agar hum hauslon ke khokhle shahtir rakhte hain

makin-e-qasr ho kar tum sukun-e-dil nahin rakhte

yahan hum ho ke be-ghar chain ki jagir rakhte hain

kisi ke dil mein kya hai chehre se zahir nahin hota

wo andar aur bahar muKHtalif taswir rakhte hain

zamana atomi hathiyar se hai lais lekin hum

gharon mein zang-aluda wahi shamshir rakhte hain

hamein kotah-fahmi ek pal bhati nahin 'ahsan'

hamari soch raushan hai bahut tanwir rakhte hain