taskīn-e-dil ko ashk-e-alam kyā bahā.ūñ maiñ
jo aag ḳhud lagā.ī hai kyūñ-kar bujhā.ūñ maiñ
barbād kar chuke vo maiñ barbād ho chukā
ab kyā rahā hai ro.uuñ aur un ko rulā.ūñ maiñ
lāchuk, nasīm-e-sub.h, payām-e-visāl-e-dost
kab tak misāl-e-sham.a rag-e-jāñ jalā.ūñ maiñ
ai ishq kyā yahī hai makāfāt-e-ārzū
apnī hī ḳhaak haath se apne uḌā.ūñ maiñ
royā yūñhī jo hijr meñ shab bhar to kyā ajab
taare kī tarah vaqt-e-sahar Duub jā.ūñ maiñ
taskin-e-dil ko ashk-e-alam kya bahaun main
jo aag KHud lagai hai kyun-kar bujhaun main
barbaad kar chuke wo main barbaad ho chuka
ab kya raha hai roun aur un ko rulaun main
lachuk, nasim-e-subh, payam-e-visal-e-dost
kab tak misal-e-shama rag-e-jaan jalaun main
ai ishq kya yahi hai makafat-e-arzu
apni hi KHak hath se apne uDaun main
roya yunhi jo hijr mein shab bhar to kya ajab
tare ki tarah waqt-e-sahar Dub jaun main
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.
