taskin-e-marg bhul gaya iztirab mein

taskīn-e-marg bhuul gayā iztirāb meñ

allāh paḌ gayā mirā dil kis azaab meñ

allāh re faroġh ruḳh-e-barq-tāb meñ

mastī meñ hai shabāb ki mastī shabāb meñ

ai dast-e-shauq aaj vo aa.e haiñ ḳhvāb meñ

dāman na chhūT jaa.e kahīñ iztirāb meñ

har naqsha-e-ḳhayāl banā aur miT gayā

ummīd ab kahāñ dil-e-ḳhāna-ḳharāb meñ

jūyā-e-aish-o-tālib-e-rāhat nahīñ huuñ

ik lutf aa rahā hai mujhe is azaab meñ

begāna-e-firāq huuñ ummīd-o-yās se

ik kashmakash hai is dil-e-ḳhāna-ḳharāb meñ

betābi-e-firāq kā aalam na pūchhiye

dāmān-e-zabt bhī hai kaf-e-iztirāb meñ

taskin-e-marg bhul gaya iztirab mein

allah paD gaya mera dil kis azab mein

allah re farogh ruKH-e-barq-tab mein

masti mein hai shabab ki masti shabab mein

ai dast-e-shauq aaj wo aae hain KHwab mein

daman na chhuT jae kahin iztirab mein

har naqsha-e-KHayal bana aur miT gaya

ummid ab kahan dil-e-KHana-KHarab mein

juya-e-aish-o-talib-e-rahat nahin hun

ek lutf aa raha hai mujhe is azab mein

begana-e-firaq hun ummid-o-yas se

ek kashmakash hai is dil-e-KHana-KHarab mein

betabi-e-firaq ka aalam na puchhiye

daman-e-zabt bhi hai kaf-e-iztirab mein