taslim ki jalwe aam nahin lekin wo zulmat bhi to nahin

taslīm ki jalve 'aam nahīñ lekin vo zulmat bhī to nahīñ

ai bad-zan sāthī aaj fazā itnī pur-haibat bhī to nahīñ

'unvān vahī afsāna vahī aisā ho to maiñ bhī kah duuñ

gulshan meñ magar vo pahlī sī vahshat kyā hairat bhī to nahīñ

haañ jāntā huuñ ab bhī lākhoñ behāl-o-be-mustaqbil haiñ

iflās bhī hai be-hālī bhī ġham hī ġham qismat bhī to nahīñ

ummīd kī sham'eñ jaag uThīñ mahfil kī tārīkī soī

kam-kam hai ujālā hai to sahī bilkul yāsiyyat bhī to nahīñ

taslim ki jalwe 'am nahin lekin wo zulmat bhi to nahin

ai bad-zan sathi aaj faza itni pur-haibat bhi to nahin

'unwan wahi afsana wahi aisa ho to main bhi kah dun

gulshan mein magar wo pahli si wahshat kya hairat bhi to nahin

han jaanta hun ab bhi lakhon behaal-o-be-mustaqbil hain

iflas bhi hai be-haali bhi gham hi gham qismat bhi to nahin

ummid ki sham'en jag uThin mahfil ki tariki soi

kam-kam hai ujala hai to sahi bilkul yasiyyat bhi to nahin