taslim mujhko main tere pasang to nahin

taslīm mujh ko maiñ tire pāsañg to nahīñ

lekin tujhe nasīb mirā rañg to nahīñ

maiñ kis liye fasīl-e-badan meñ chhupā rahūñ

merī kisī ke saath koī jañg to nahīñ

ghabrā rahe ho kyuuñ mirī bastī kā fāsla

hai chand gaam saiñkaḌoñ farsañg to nahīñ

bharte ho kis liye mirī tasvīr meñ ye rañg

mauj-e-shafaq kā rañg mirā rañg to nahīñ

be-ehtiyātiyoñ se tirī TuuT jā.egā

dil ek aa.ina hai koī sañg to nahīñ

phir kyuuñ karūñ ḳhayāl kisī aur des kā

mere liye zamīn-e-vatan tañg to nahīñ

din raat apne aap se rahnā ḳhafā ḳhafā

'shāhid' guzar-basar kā koī Dhañg to nahīñ

taslim mujh ko main tere pasang to nahin

lekin tujhe nasib mera rang to nahin

main kis liye fasil-e-badan mein chhupa rahun

meri kisi ke sath koi jang to nahin

ghabra rahe ho kyun meri basti ka fasla

hai chand gam sainkaDon farsang to nahin

bharte ho kis liye meri taswir mein ye rang

mauj-e-shafaq ka rang mera rang to nahin

be-ehtiyatiyon se teri TuT jaega

dil ek aaina hai koi sang to nahin

phir kyun karun KHayal kisi aur des ka

mere liye zamin-e-watan tang to nahin

din raat apne aap se rahna KHafa KHafa

'shahid' guzar-basar ka koi Dhang to nahin