taswir ka har rang nazar mein hai

tasvīr kā har rañg nazar meñ hai

kyā baat tire dast-e-hunar meñ hai

sonā sā pighaltā hai rag o pai meñ

ḳhurshīd-e-havas kāsa-e-sar meñ hai

niklā huuñ to kyā raḳht-e-safar bāñdhūñ

jo kuchh hai vo sab rāhguzar meñ hai

ik raat hai phailī huī sadiyoñ par

har lamha añdheroñ ke asar meñ hai

paanī hai sarāboñ se virāsat meñ

vo ḳhaak jo dāmān-e-nazar meñ hai

peshāni-e-ā.īna pe ho zāhir

jo zaḳhm dil-e-ā.īna-gar meñ hai

kyā mahkeñ tamannāoñ ke gul buuTe

vīrānī-e-sahrā mire ghar meñ hai

taswir ka har rang nazar mein hai

kya baat tere dast-e-hunar mein hai

sona sa pighalta hai rag o pai mein

KHurshid-e-hawas kasa-e-sar mein hai

nikla hun to kya raKHt-e-safar bandhun

jo kuchh hai wo sab rahguzar mein hai

ek raat hai phaili hui sadiyon par

har lamha andheron ke asar mein hai

pani hai sarabon se wirasat mein

wo KHak jo daman-e-nazar mein hai

peshani-e-aina pe ho zahir

jo zaKHm dil-e-aina-gar mein hai

kya mahken tamannaon ke gul buTe

virani-e-sahra mere ghar mein hai