taswir mein rang bhar rahe hain

tasvīr meñ rañg bhar rahe haiñ

milne kā irāda kar rahe haiñ

ḳhushiyāñ hī nahīñ thiiñ saath mere

ġham bhī mere ham-safar rahe haiñ

āñkheñ to khulī huī thiiñ phir bhī

har baat se be-ḳhabar rahe haiñ

koī rāhat milī na ahl-e-fan ko

ārām se be-hunar rahe haiñ

baaqī nahīñ dil meñ shauq-e-parvāz

muddat se be-bāl-o-par rahe haiñ

urdu sī zabāñ pe kuchh muḳhālif

har samt se vaar kar rahe haiñ

ik umr se ahl-e-dil ke Dere

talvār kī dhaar par rahe haiñ

mushtāq to jā chuke haiñ 'kausar'

ab kis liye ban-sañvar rahe haiñ

taswir mein rang bhar rahe hain

milne ka irada kar rahe hain

KHushiyan hi nahin thin sath mere

gham bhi mere ham-safar rahe hain

aankhen to khuli hui thin phir bhi

har baat se be-KHabar rahe hain

koi rahat mili na ahl-e-fan ko

aaram se be-hunar rahe hain

baqi nahin dil mein shauq-e-parwaz

muddat se be-baal-o-par rahe hain

urdu si zaban pe kuchh muKHalif

har samt se war kar rahe hain

ek umr se ahl-e-dil ke Dere

talwar ki dhaar par rahe hain

mushtaq to ja chuke hain 'kausar'

ab kis liye ban-sanwar rahe hain