tawaf-e-mai-kada hi se hai mujhko kaam ai saqi

tavāf-e-mai-kada hī se hai mujh ko kaam ai saaqī

yahī īmāñ yahī hai shaġhl sub.h-o-shām ai saaqī

baḌhā de merī jānib bhī kuchh aise jaam ai saaqī

miTe jin se ki fikr-e-gardish-e-ayyām ai saaqī

tire dar se jo phir jā.ūñgā maiñ nākām ai saaqī

batā de tū hī kyā hogā mirā anjām ai saaqī

mujhe donoñ jahāñ se kar de jo be-kām ai saaqī

ho jis meñ aks-e-rū-e-yār de vo jaam ai saaqī

jo le le merī rāhat aur mirā ārām ai saaqī

rahe jo hashr tak gardish meñ de vo jaam ai saaqī

pilā kar mai mujhe tū chheḌ de sāz-e-taraf aisā

sunā de be-ḳhudī kā mujh ko jo paiġhām ai saaqī

vo mai-ālūd ḳhirqa de ḳhudā ke vāste mujh ko

zamāne bhar meñ jo kar de mujhe badnām ai saaqī

miTā de ḳhud-parastī ko jo mai vo mai atā kar de

vo mai jis se na ho parvā-e-nang-o-nām ai saaqī

ye hai kis rind kī mayyit jo mai se ġhusl dete vaqt

machā hai mai-kashoñ meñ har taraf kohrām ai saaqī

isī se hotī jaatī hai jarāhat mere zaḳhmoñ kī

batā.ūñ kyā tujhe maiñ lazzat-e-dushnām ai saaqī

mai-e-sar-ḳhush mujhe vo tū pilā de apne hāthoñ se

bhulā de jo mire dil se ġham-e-ayyām ai saaqī

hamārī bāda-noshī hashr meñ bhī rang lā.egī

vahī laġhzish vahī hāthoñ meñ hogā jaam ai saaqī

utar aa.ī mire dil meñ jo chhalkī terī āñkhoñ se

yahī shīsha hai merā aur yahī hai jaam ai saaqī

mujhe mai dene se kis vāste tū hichkichātā hai

mujhe ma.alūm hai āġhāz aur anjām ai saaqī

ḳhumār-e-bāda se hotā hai jis dam sargirāñ 'mehdī'

batā detī hai merī laġhzish-har-gām ai saaqī

tawaf-e-mai-kada hi se hai mujh ko kaam ai saqi

yahi iman yahi hai shaghl subh-o-sham ai saqi

baDha de meri jaanib bhi kuchh aise jam ai saqi

miTe jin se ki fikr-e-gardish-e-ayyam ai saqi

tere dar se jo phir jaunga main nakaam ai saqi

bata de tu hi kya hoga mera anjam ai saqi

mujhe donon jahan se kar de jo be-kaam ai saqi

ho jis mein aks-e-ru-e-yar de wo jam ai saqi

jo le le meri rahat aur mera aaram ai saqi

rahe jo hashr tak gardish mein de wo jam ai saqi

pila kar mai mujhe tu chheD de saz-e-taraf aisa

suna de be-KHudi ka mujh ko jo paigham ai saqi

wo mai-alud KHirqa de KHuda ke waste mujh ko

zamane bhar mein jo kar de mujhe badnam ai saqi

miTa de KHud-parasti ko jo mai wo mai ata kar de

wo mai jis se na ho parwa-e-nang-o-nam ai saqi

ye hai kis rind ki mayyit jo mai se ghusl dete waqt

macha hai mai-kashon mein har taraf kohram ai saqi

isi se hoti jati hai jarahat mere zaKHmon ki

bataun kya tujhe main lazzat-e-dushnam ai saqi

mai-e-sar-KHush mujhe wo tu pila de apne hathon se

bhula de jo mere dil se gham-e-ayyam ai saqi

hamari baada-noshi hashr mein bhi rang laegi

wahi laghzish wahi hathon mein hoga jam ai saqi

utar aai mere dil mein jo chhalki teri aankhon se

yahi shisha hai mera aur yahi hai jam ai saqi

mujhe mai dene se kis waste tu hichkichata hai

mujhe malum hai aaghaz aur anjam ai saqi

KHumar-e-baada se hota hai jis dam sargiran 'mehdi'

bata deti hai meri laghzish-har-gam ai saqi