tazkire aish ke KHamosh fughan tak pahunche

tazkire aish ke ḳhāmosh fuġhāñ tak pahuñche

dekhte dekhte hālāt kahāñ tak pahuñche

jaane kab un kī nazar dard-e-nihāñ tak pahuñche

dil meñ Duube the jo nashtar rag-e-jāñ tak pahuñche

vaqt ne kar diye kuchh fāsle itne paidā

pyaar ke giit bhī mushkil se zabāñ tak pahuñche

vo to hone ko rag-e-jāñ se qarīñ haiñ lekin

aadmī pahle maqām-e-rag-e-jāñ tak pahuñche

ham to begāna-e-manzil haiñ hamārā kyā hai

jin kī nazroñ meñ thī manzil vo kahāñ tak pahuñche

aam kyā ho sakīñ bāteñ tire dīvānoñ kī

kaun pahuñche hue logoñ kī zabāñ tak pahuñche

ik tasavvur se tire raushnī mil jaatī hai

varna ab ġham ke añdhere dil-o-jāñ tak pahuñche

sab mire hāl-e-pareshāñ pe nazar rakhte haiñ

dekhtā kaun hai hālāt kahāñ tak pahuñche

zindagī kitnī hai ḳhushiyoñ kī guloñ se pūchho

ik tabassum meñ bahāroñ se ḳhizāñ tak pahuñche

tere tevar se bhī tujh tak hai pahuñchnā mushkil

kyā huā log jo nazroñ kī zabāñ tak pahuñche

'shauq' yuuñ hī nahīñ vahshat hameñ aap apne se

marhale tai hue kitne to yahāñ tak pahuñche

tazkire aish ke KHamosh fughan tak pahunche

dekhte dekhte haalat kahan tak pahunche

jaane kab un ki nazar dard-e-nihan tak pahunche

dil mein Dube the jo nashtar rag-e-jaan tak pahunche

waqt ne kar diye kuchh fasle itne paida

pyar ke git bhi mushkil se zaban tak pahunche

wo to hone ko rag-e-jaan se qarin hain lekin

aadmi pahle maqam-e-rag-e-jaan tak pahunche

hum to begana-e-manzil hain hamara kya hai

jin ki nazron mein thi manzil wo kahan tak pahunche

aam kya ho sakin baaten tere diwanon ki

kaun pahunche hue logon ki zaban tak pahunche

ek tasawwur se tere raushni mil jati hai

warna ab gham ke andhere dil-o-jaan tak pahunche

sab mere haal-e-pareshan pe nazar rakhte hain

dekhta kaun hai haalat kahan tak pahunche

zindagi kitni hai KHushiyon ki gulon se puchho

ek tabassum mein bahaaron se KHizan tak pahunche

tere tewar se bhi tujh tak hai pahunchna mushkil

kya hua log jo nazron ki zaban tak pahunche

'shauq' yun hi nahin wahshat hamein aap apne se

marhale tai hue kitne to yahan tak pahunche