tegh-e-barran nikalo sahab

teġh-e-barrān nikālo sāhab

dil ke armān nikālo sāhab

ghar se rakhte ho qadam kyuuñ bāhar

na mirī jaan nikālo sāhab

dekh rahne se ḳhafā ho to mirī

chashm-e-hairān nikālo sāhab

hai ye nāsūr-e-jigar kī battī

tum na paikān nikālo sāhab

rahne do ghar meñ na mujh par nāhaq

rakh ke bohtān nikālo sāhab

baar aġhyār ko ḳhalvat meñ na do

haiñ bad insān, nikālo sāhab

hai mirī tarah tumhārā kahīñ dhyān

dil se ye dhyān nikālo sāhab

gaalī nāhaq na kisī ke haq meñ

muñh se har aan nikālo sāhab

haa.e ye ranjish-e-bejā dil se

kisī unvān nikālo sāhab

sar-e-bāzār na baiThā karo tum

kuchh to ab shaan nikālo sāhab

garm-bāzārī kī ḳhātir sar-e-rāh

tum na dūkān nikālo sāhab

hasrat-e-vasl hai 'jur.at' ko kamāl

lo ye armān nikālo sāhab

tegh-e-barran nikalo sahab

dil ke arman nikalo sahab

ghar se rakhte ho qadam kyun bahar

na meri jaan nikalo sahab

dekh rahne se KHafa ho to meri

chashm-e-hairan nikalo sahab

hai ye nasur-e-jigar ki batti

tum na paikan nikalo sahab

rahne do ghar mein na mujh par nahaq

rakh ke bohtan nikalo sahab

bar aghyar ko KHalwat mein na do

hain bad insan, nikalo sahab

hai meri tarah tumhaara kahin dhyan

dil se ye dhyan nikalo sahab

gali nahaq na kisi ke haq mein

munh se har aan nikalo sahab

hae ye ranjish-e-beja dil se

kisi unwan nikalo sahab

sar-e-bazar na baiTha karo tum

kuchh to ab shan nikalo sahab

garm-bazari ki KHatir sar-e-rah

tum na dukan nikalo sahab

hasrat-e-wasl hai 'jurat' ko kamal

lo ye arman nikalo sahab