tera ehsas-e-KHudi hoga na jab tak bedar

terā ehsās-e-ḳhudī hogā na jab tak bedār

ġhair mumkin hai khuleñ tujh pe azal ke asrār

ḳhud mashiyyat tirī ek ek adā par ho nisār

apnī sūrat kā mayassar jo tujhe ho dīdār

kitne jalve tujhe labbaik kaheñge nādāñ

chiir kar dekh zarā sīna-e-hastī ik baar

apnī quvvat se tū vāqif hī nahīñ hai varna

arsh se bhī kahīñ ūñchā hai tirā izz-o-vaqār

maut sab jis ko samajhte haiñ zamāne vaale

tere pairāhan-e-hastī kā hai dhuñdlā sā ġhubār

sab tire zer-e-nagīñ haiñ falak-o-māh-o-nujūm

terī gardish pe hai har ek kī gardish kā madār

phūñk de ḳhār-o-ḳhas-e-ālam-e-zāhir pahle

ḳhud nazar aa.egā har shai meñ ruḳh-e-pur-anvār

husn-e-sad-rañg se vo kaif-e-nazar hāsil kar

jis se ho jaa.eñ dil-o-rūh abad tak sarshār

ik ravish bhī na guzargāh-e-ḳhizāñ ho jis kī

tujh se mumkin ho to paidā kar ik aisī bhī bahār

sar-e-amvāj-e-havādis ko samajhne vaale

kār-e-āsāñ ko banā lete haiñ kār-e-dushvār

laakh sāmān hoñ ishrat ke muhayyā lekin

dil sī shai ke liye duniyā meñ sukūñ hai na qarār

zindagī bhar jinheñ kahtī rahī duniyā kāfir

ab zamāne meñ kahāñ 'ārzū' aise dīñ-dār

tera ehsas-e-KHudi hoga na jab tak bedar

ghair mumkin hai khulen tujh pe azal ke asrar

KHud mashiyyat teri ek ek ada par ho nisar

apni surat ka mayassar jo tujhe ho didar

kitne jalwe tujhe labbaik kahenge nadan

chir kar dekh zara sina-e-hasti ek bar

apni quwwat se tu waqif hi nahin hai warna

arsh se bhi kahin uncha hai tera izz-o-waqar

maut sab jis ko samajhte hain zamane wale

tere pairahan-e-hasti ka hai dhundla sa ghubar

sab tere zer-e-nagin hain falak-o-mah-o-nujum

teri gardish pe hai har ek ki gardish ka madar

phunk de KHar-o-KHas-e-alam-e-zahir pahle

KHud nazar aaega har shai mein ruKH-e-pur-anwar

husn-e-sad-rang se wo kaif-e-nazar hasil kar

jis se ho jaen dil-o-ruh abad tak sarshaar

ek rawish bhi na guzargah-e-KHizan ho jis ki

tujh se mumkin ho to paida kar ek aisi bhi bahaar

sar-e-amwaj-e-hawadis ko samajhne wale

kar-e-asan ko bana lete hain kar-e-dushwar

lakh saman hon ishrat ke muhayya lekin

dil si shai ke liye duniya mein sukun hai na qarar

zindagi bhar jinhen kahti rahi duniya kafir

ab zamane mein kahan 'arzu' aise din-dar