tera firaq arsa-e-mehshar laga mujhe

terā firāq arsa-e-mehshar lagā mujhe

jab bhī ḳhayāl aayā baḌā Dar lagā mujhe

jab bhī kiyā irāda-e-tark-e-ta.alluqāt

kyā jaane kyoñ vo shoḳh hasīñ-tar lagā mujhe

parkhā to zulmatoñ ke sivā aur kuchh na thā

dekhā to ek nuur kā paikar lagā mujhe

ḳhud apnī zaat par bhī na rah jaa.e e'tibār

ai vaqt ho sake to vo nashtar lagā mujhe

kyā jaane kis jahān meñ baste haiñ narm-dil

maiñ ne jise chhuā vahī patthar lagā mujhe

ik martaba zarūr nazar phir se uTh ga.ī

jo qad bhī tere qad ke barābar lagā mujhe

qismat isī ko kahte haiñ phūloñ kī sej par

leTā jo maiñ to kāñToñ kā bistar lagā mujhe

us phuul kā kaleja milā ġham se paash paash

jo phuul dekhne meñ gul-e-tar lagā mujhe

dil hañs ke jhel jaa.e ye baat aur hai magar

charkā tirī nigāh kā aksar lagā mujhe

duniyā kā ye nizām ye me.ār-e-sīm-o-zar

kamtar lagā mujhe kabhī bad-tar lagā mujhe

un kī galī kī baat hī 'qādir' ajiib hai

har shaḳhs sher-fahm-o-suḳhnavar lagā mujhe

tera firaq arsa-e-mehshar laga mujhe

jab bhi KHayal aaya baDa Dar laga mujhe

jab bhi kiya irada-e-tark-e-talluqat

kya jaane kyon wo shoKH hasin-tar laga mujhe

parkha to zulmaton ke siwa aur kuchh na tha

dekha to ek nur ka paikar laga mujhe

KHud apni zat par bhi na rah jae e'tibar

ai waqt ho sake to wo nashtar laga mujhe

kya jaane kis jahan mein baste hain narm-dil

main ne jise chhua wahi patthar laga mujhe

ek martaba zarur nazar phir se uTh gai

jo qad bhi tere qad ke barabar laga mujhe

qismat isi ko kahte hain phulon ki sej par

leTa jo main to kanTon ka bistar laga mujhe

us phul ka kaleja mila gham se pash pash

jo phul dekhne mein gul-e-tar laga mujhe

dil hans ke jhel jae ye baat aur hai magar

charka teri nigah ka aksar laga mujhe

duniya ka ye nizam ye mear-e-sim-o-zar

kamtar laga mujhe kabhi bad-tar laga mujhe

un ki gali ki baat hi 'qadir' ajib hai

har shaKHs sher-fahm-o-suKHnawar laga mujhe