tera hi zikr harsu tera hi bayan mile

terā hī zikr harsū tirā hī bayāñ mile

kholūñ koī kitāb terī dāstāñ mile

duniyā ke shor-o-shar se bahut tañg aa ga.e

mumkin hai ab tirī hī galī amaañ mile

paidā to kar bulandiyāñ apne ḳhayāl meñ

shāyad usī zamīñ pe tujhe āsmāñ mile

bas ek baar us se mulāqāt kyā huī

tā-umr apne aap ko phir ham mile

mahsūs tere qadmoñ kī ho āhaTeñ jahāñ

un rāstoñ pe bikhrī huī kahkashāñ mile

DhūñD to tū kahīñ bhī dikhā.ī na de mujhe

dekhūñ to zarre zarre meñ tū hī nihāñ mile

vo bad-nasīb hai jo bhaTakte hai dar-ba-dar

vo ḳhush-nasīb jin ko terā āstāñ mile

tera hi zikr harsu tera hi bayan mile

kholun koi kitab teri dastan mile

duniya ke shor-o-shar se bahut tang aa gae

mumkin hai ab teri hi gali aman mile

paida to kar bulandiyan apne KHayal mein

shayad usi zamin pe tujhe aasman mile

bas ek bar us se mulaqat kya hui

ta-umr apne aap ko phir hum mile

mahsus tere qadmon ki ho aahaTen jahan

un raston pe bikhri hui kahkashan mile

DhunD to tu kahin bhi dikhai na de mujhe

dekhun to zarre zarre mein tu hi nihan mile

wo bad-nasib hai jo bhaTakte hai dar-ba-dar

wo KHush-nasib jin ko tera aastan mile