tera KHuda hai jo ki tere se juda nahin

terā ḳhudā hai jo ki tire se judā nahīñ

jo koī judā hai tujh se o terā ḳhudā nahīñ

hai āftāb roz se yak dam nahīñ judā

gar ho judā to jaan vo shamsuzzuhā nahīñ

terā nabī nahīñ hai tire se 'alāheda

jo hai 'alāheda vo payambar tirā nahīñ

jaisā ki asl chhāñv se yak-dam nahīñ judā

gar ho judā to asl us chhāñv kā nahīñ

jo rahnumā tirā hai tire saath hai mudām

gar ho na tere saath tirā rahnumā nahīñ

'bedil' ke saath jo ki rahe dilrubā mudām

na ho agar vo saath tirā dilrubā nahīñ

kahte haiñ jis ko ḳhalq mohammad vo hai ḳhudā

ya.anī ḳhudā judā va mohammad judā nahīñ

tera KHuda hai jo ki tere se juda nahin

jo koi juda hai tujh se o tera KHuda nahin

hai aaftab roz se yak dam nahin juda

gar ho juda to jaan wo shamsuzzuha nahin

tera nabi nahin hai tere se 'alaheda

jo hai 'alaheda wo payambar tera nahin

jaisa ki asl chhanw se yak-dam nahin juda

gar ho juda to asl us chhanw ka nahin

jo rahnuma tera hai tere sath hai mudam

gar ho na tere sath tera rahnuma nahin

'bedil' ke sath jo ki rahe dilruba mudam

na ho agar wo sath tera dilruba nahin

kahte hain jis ko KHalq mohammad wo hai KHuda

yani KHuda juda wa mohammad juda nahin