tera munh gardish-e-ayyam kahan tak dekhun

terā muñh gardish-e-ayyām kahāñ tak dekhūñ

ye bhayānak sahar-o-shām kahāñ tak dekhūñ

jazba-e-ishq ko nākām kahāñ tak dekhūñ

sitam-e-gardish-e-ayyām kahāñ tak dekhūñ

ishq kā sheva-e-ḳhud-kām kahāñ tak dekhūñ

ye tilism-e-sahr-o-shām kahāñ tak dekhūñ

husn ko larza-bar-andām kahāñ tak dekhūñ

ishq-o-yaksāniyat-e-ām kahāñ tak dekhūñ

o jafā-kesh jafāoñ se hazar lāzim hai

tujh ko yuuñ morid-e-ilzām kahāñ tak dekhūñ

harf aatā hai tirī shān-e-karam par saaqī

apne hāthoñ ko tahī-jām kahāñ tak dekhūñ

be-niyāzī pe tujhe naaz bajā hai lekin

lab pe aa.e na mirā naam kahāñ tak dekhūñ

ek jur.a to mujhe bhī tire mai-ḳhāne kī

duur se daur-e-mai-o-jām kahāñ tak dekhūñ

ab na vo dil hai na vo dil kī umañgeñ baaqī

aur ab ishq kā anjām kahāñ tak dekhūñ

be-ruḳhī aap kī mere dil-e-majbūr kā sabr

kaun aatā hai mire kaam kahāñ tak dekhūñ

said to said hai sayyād bhī phañs jaatā hai

tū na aa.egā tah-e-dām kahāñ tak dekhūñ

ek hī dar pe tirī umr kaTī ai 'sābir'

yuuñ mujhe banda-e-be-dām kahāñ tak dekhūñ

tera munh gardish-e-ayyam kahan tak dekhun

ye bhayanak sahar-o-sham kahan tak dekhun

jazba-e-ishq ko nakaam kahan tak dekhun

sitam-e-gardish-e-ayyam kahan tak dekhun

ishq ka shewa-e-KHud-kaam kahan tak dekhun

ye tilism-e-sahr-o-sham kahan tak dekhun

husn ko larza-bar-andam kahan tak dekhun

ishq-o-yaksaniyat-e-am kahan tak dekhun

o jafa-kesh jafaon se hazar lazim hai

tujh ko yun morid-e-ilzam kahan tak dekhun

harf aata hai teri shan-e-karam par saqi

apne hathon ko tahi-jam kahan tak dekhun

be-niyazi pe tujhe naz baja hai lekin

lab pe aae na mera nam kahan tak dekhun

ek jura to mujhe bhi tere mai-KHane ki

dur se daur-e-mai-o-jam kahan tak dekhun

ab na wo dil hai na wo dil ki umangen baqi

aur ab ishq ka anjam kahan tak dekhun

be-ruKHi aap ki mere dil-e-majbur ka sabr

kaun aata hai mere kaam kahan tak dekhun

said to said hai sayyaad bhi phans jata hai

tu na aaega tah-e-dam kahan tak dekhun

ek hi dar pe teri umr kaTi ai 'sabir'

yun mujhe banda-e-be-dam kahan tak dekhun