tera wo karam teri jafa yaad hai ab tak

terā vo karam terī jafā yaad hai ab tak

sab kuchh mujhe ai jān-e-hayā yaad hai ab tak

aayā thā zabāñ par mirī kyoñ harf-e-tamannā

kyoñ ho gayā thā koī ḳhafā yaad hai ab tak

shānoñ pe mire vasl kī shab ḳhaas adā se

rahtī thī tirī zulf-e-rasā yaad hai ab tak

kahne pe mire aao mire paas to baiTho

vo un ke bigaḌne kī adā yaad hai ab tak

aa jaao agar tum to tumhīñ se kabhī pūchhūñ

kyā bhuul gayā huuñ mujhe kyā yaad hai ab tak

barsī thī jo paimāna uThāte hī hamāre

kyā tum ko bhī vo mast ghaTā yaad hai ab tak

rahtā thā mire haath meñ jo dast-e-hinā.ī

us haath kī ḳhushbū-e-hinā yaad hai ab tak

muddat huī us ko ki mirī ḳhalvat-e-shab meñ

paiġhām jo laa.ī thī sabā yaad hai ab tak

tā.īd meñ jis ke the dhaḌakte hue do dil

kyā tum ko vo paimān-e-vafā yaad hai ab tak

thā 'soz' sar-e-mai-kada jab koī ham-āġhosh

vo sohbat-e-rañgīñ ba-ḳhudā yaad hai ab tak

tera wo karam teri jafa yaad hai ab tak

sab kuchh mujhe ai jaan-e-haya yaad hai ab tak

aaya tha zaban par meri kyon harf-e-tamanna

kyon ho gaya tha koi KHafa yaad hai ab tak

shanon pe mere wasl ki shab KHas ada se

rahti thi teri zulf-e-rasa yaad hai ab tak

kahne pe mere aao mere pas to baiTho

wo un ke bigaDne ki ada yaad hai ab tak

aa jao agar tum to tumhin se kabhi puchhun

kya bhul gaya hun mujhe kya yaad hai ab tak

barsi thi jo paimana uThate hi hamare

kya tum ko bhi wo mast ghaTa yaad hai ab tak

rahta tha mere hath mein jo dast-e-hinai

us hath ki KHushbu-e-hina yaad hai ab tak

muddat hui us ko ki meri KHalwat-e-shab mein

paigham jo lai thi saba yaad hai ab tak

taid mein jis ke the dhaDakte hue do dil

kya tum ko wo paiman-e-wafa yaad hai ab tak

tha 'soz' sar-e-mai-kada jab koi ham-aghosh

wo sohbat-e-rangin ba-KHuda yaad hai ab tak