tere aane ka mere dost bharam rakkha hai

tere aane kā mire dost bharam rakkhā hai

vo mirā dil hai jahāñ tū ne qadam rakkhā hai

tū hai saaqī to mirī jaan mirī pyaas na pūchh

ḳhum kā ḳhum tū ne jo rakkhā hai ye kam rakkhā hai

merī sāñsoñ meñ basī hai vahī ḳhushbū ab tak

us ne bhī zulfoñ meñ ab tak vahī ḳham rakhā hai

dekh tū 'ishq kī shiddat ki tirī chāhat meñ

but-shikan ne tire patthar ko sanam rakkhā hai

yuuñ hañsī aatī hai be-bāt pe aksar ham ko

ham ne siine meñ chhupā kar koī ġham rakkhā hai

chaak gardish meñ hai phir jaam na.e ubhreñge

ham ne miTTī ko isī aas pe nam rakkhā hai

faisla jang kā is baar anokhā hogā

ham ne talvār ke baazū meñ qalam rakkhā hai

tere aane ka mere dost bharam rakkha hai

wo mera dil hai jahan tu ne qadam rakkha hai

tu hai saqi to meri jaan meri pyas na puchh

KHum ka KHum tu ne jo rakkha hai ye kam rakkha hai

meri sanson mein basi hai wahi KHushbu ab tak

us ne bhi zulfon mein ab tak wahi KHam rakha hai

dekh tu 'ishq ki shiddat ki teri chahat mein

but-shikan ne tere patthar ko sanam rakkha hai

yun hansi aati hai be-baat pe aksar hum ko

hum ne sine mein chhupa kar koi gham rakkha hai

chaak gardish mein hai phir jam nae ubhrenge

hum ne miTTi ko isi aas pe nam rakkha hai

faisla jang ka is bar anokha hoga

hum ne talwar ke bazu mein qalam rakkha hai