tere hasin jism ki phulon mein boss hai

tere hasīn jism kī phūloñ meñ boss hai

go vahm hai ye vahm qarīn-e-qayās hai

vo ashk jis pe chāñdnī-shab kā libās hai

shāyad kitāb-e-ġham kā koī iqtibās hai

merī tarah har ik ko hai chāhat usī kī phir

guzre dinoñ ke zahr meñ kitnī miThās hai

barsoñ guzar ga.e magar ab tak nahīñ bujhī

kitnī 'ajīb ret ke sāhil kī pyaas hai

merī sadā khich is tarah aa.ī hai lauT kar

mahsūs ho rahā hai koī ās-pās hai

būñdeñ paḌeñ to aur ziyāda huī tapish

shāyad isī kā naam zamīñ kī bhaḌās hai

apne gharoñ meñ ḳhush haiñ charāġhoñ ko le ke log

kis ko ḳhabar ki raat kā chehra udaas hai

dhuñdlā sā zard maazī kā ho jis tarah varaq

kitnā hasīn aap kā rañg-e-libās hai

kis vaqt 'kaif' TuuT ke gir jaa.e kyā ḳhabar

palkoñ pe ek halqa-e-zanjīr-e-yās hai

tere hasin jism ki phulon mein boss hai

go wahm hai ye wahm qarin-e-qayas hai

wo ashk jis pe chandni-shab ka libas hai

shayad kitab-e-gham ka koi iqtibas hai

meri tarah har ek ko hai chahat usi ki phir

guzre dinon ke zahr mein kitni miThas hai

barson guzar gae magar ab tak nahin bujhi

kitni 'ajib ret ke sahil ki pyas hai

meri sada khich is tarah aai hai lauT kar

mahsus ho raha hai koi aas-pas hai

bunden paDen to aur ziyaada hui tapish

shayad isi ka nam zamin ki bhaDas hai

apne gharon mein KHush hain charaghon ko le ke log

kis ko KHabar ki raat ka chehra udas hai

dhundla sa zard mazi ka ho jis tarah waraq

kitna hasin aap ka rang-e-libas hai

kis waqt 'kaif' TuT ke gir jae kya KHabar

palkon pe ek halqa-e-zanjir-e-yas hai