tere hisse ka bach gaya hai kuchh

tere hisse kā bach gayā hai kuchh

merī āñkhoñ meñ chubh rahā hai kuchh

ham bhī māhir haiñ ab tere fan meñ

dil meñ hai kuchh magar kahā hai kuchh

yaad karnā tumheñ hai aadat meñ

varna dil meñ nahīñ bacha hai kuchh

din meñ bhī sochte haiñ ham tujh ko

raat is baat pe ḳhafā hai kuchh

na huā merā aur na us kā hī

dil ke hone kā fā.eda hai kuchh

ik sitāre ke TuuT jaane se

arsh kā bojh baḌh gayā hai kuchh

terī āñkheñ jise mayassar hoñ

phir kahāñ us ko aa.ina hai kuchh

jaan niklī na tere jaane pe

mere haq meñ ajab sazā hai kuchh

sirf mere nahīñ haiñ ye aañsū

in meñ hissa raqīb kā hai kuchh

ab duā.eñ mirī nahīñ suntā

arsh būḌhā sā ho gayā hai kuchh

tere hisse ka bach gaya hai kuchh

meri aankhon mein chubh raha hai kuchh

hum bhi mahir hain ab tere fan mein

dil mein hai kuchh magar kaha hai kuchh

yaad karna tumhein hai aadat mein

warna dil mein nahin bacha hai kuchh

din mein bhi sochte hain hum tujh ko

raat is baat pe KHafa hai kuchh

na hua mera aur na us ka hi

dil ke hone ka faeda hai kuchh

ek sitare ke TuT jaane se

arsh ka bojh baDh gaya hai kuchh

teri aankhen jise mayassar hon

phir kahan us ko aaina hai kuchh

jaan nikli na tere jaane pe

mere haq mein ajab saza hai kuchh

sirf mere nahin hain ye aansu

in mein hissa raqib ka hai kuchh

ab duaen meri nahin sunta

arsh buDha sa ho gaya hai kuchh