tere KHamosh takallum ka sahaara ho jaun

tere ḳhāmosh takallum kā sahārā ho jā.ūñ

terā andāz badal duuñ tirā lahja ho jā.ūñ

tū mire lams kī tāsīr se vāqif hī nahīñ

tujh ko chhū luuñ to tire jism kā hissa ho jā.ūñ

tere hoñToñ ke liye hoñT mere āb-e-hayāt

aur koī jo chhue zahr kā pyāla ho jā.ūñ

kar diyā tere taġhāful ne adhūrā mujh ko

ek hichkī agar aa jaa.e to puurā ho jā.ūñ

dil ye kartā hai ki is umr kī pagDanDī par

ulTe pairoñ se chalūñ phir vahī laḌkā ho jā.ūñ

apnī takmīl kā kuchh zā.iqa tabdīl karūñ

tujh se bichhḌūñ maiñ zarā der adhūrā ho jā.ūñ

dil ki sohbat mujhe har vaqt javāñ rakhtī hai

aql ke saath chalā jā.ūñ to buDDhā ho jā.ūñ

is qadar chīḳhtī rahtī hai ḳhāmoshī mujh meñ

shor kānoñ meñ utar jaa.e to bahrā ho jā.ūñ

tere chaḌhte hue dariyā ko pashemāñ kar duuñ

tujh ko paane ke liye ret kā sahrā ho jā.ūñ

aap hastī ko tire shauq pe qurbān karūñ

tū agar toḌ ke ḳhush ho to khilaunā ho jā.ūñ

tere KHamosh takallum ka sahaara ho jaun

tera andaz badal dun tera lahja ho jaun

tu mere lams ki tasir se waqif hi nahin

tujh ko chhu lun to tere jism ka hissa ho jaun

tere honTon ke liye honT mere aab-e-hayat

aur koi jo chhue zahr ka pyala ho jaun

kar diya tere taghaful ne adhura mujh ko

ek hichki agar aa jae to pura ho jaun

dil ye karta hai ki is umr ki pagDanDi par

ulTe pairon se chalun phir wahi laDka ho jaun

apni takmil ka kuchh zaiqa tabdil karun

tujh se bichhDun main zara der adhura ho jaun

dil ki sohbat mujhe har waqt jawan rakhti hai

aql ke sath chala jaun to buDDha ho jaun

is qadar chiKHti rahti hai KHamoshi mujh mein

shor kanon mein utar jae to bahra ho jaun

tere chaDhte hue dariya ko pasheman kar dun

tujh ko pane ke liye ret ka sahra ho jaun

aap hasti ko tere shauq pe qurban karun

tu agar toD ke KHush ho to khilauna ho jaun