tere nalon se koi badnam hota jaega

tere nāloñ se koī badnām hotā jā.egā

tū bhī ai dil morid-e-ilzām hotā jā.egā

mutma.in huuñ maiñ ki ho jā.egā sāmān-e-sukūñ

dard baḌhtā jā.egā ārām hotā jā.egā

vaj.h-e-nākāmī na hoñ ai dil tirī be-sabriyāñ

sabr se le kaam ḳhud har kaam hotā jā.egā

chhoḌ de ai dil tamannā zindagī kī chhoḌ de

tū halāk-e-gardish-e-ayyām hotā jā.egā

ham tahī-dastān-e-qismat mar ga.e pyāse to kyā

mai-kade meñ yūñhī daur-e-jām hotā jā.egā

iltifāt-e-nāz jo maḳhsūs thā mere liye

kyā ḳhabar thī rafta rafta aam hotā jā.egā

aib hai 'shākir' har ik ke sāmne arz-e-hunar

naam kī ḳhvāhish meñ tū badnām hotā jā.egā

tere nalon se koi badnam hota jaega

tu bhi ai dil morid-e-ilzam hota jaega

mutmain hun main ki ho jaega saman-e-sukun

dard baDhta jaega aaram hota jaega

wajh-e-nakaami na hon ai dil teri be-sabriyan

sabr se le kaam KHud har kaam hota jaega

chhoD de ai dil tamanna zindagi ki chhoD de

tu halak-e-gardish-e-ayyam hota jaega

hum tahi-dastan-e-qismat mar gae pyase to kya

mai-kade mein yunhi daur-e-jam hota jaega

iltifat-e-naz jo maKHsus tha mere liye

kya KHabar thi rafta rafta aam hota jaega

aib hai 'shakir' har ek ke samne arz-e-hunar

nam ki KHwahish mein tu badnam hota jaega