tere sath chehre hain mere sang aaina

tere saath chehre haiñ mere sañg aa.ina

dekh aaj hotā hai kis pe tañg ā.īna

bol ḳhud-shanāsī phir kis tarah se mumkin ho

pesh kar rahā ho jab saat rañg ā.īna

ḳhud-parastiyoñ ne bhī ḳhuub raushnī baḳhshī

ban gayā añdheroñ meñ ek sañg ā.īna

laḳht-laḳht āvāzeñ fard fard pahchāneñ

shor shor ḳhāmoshī vaj.h-e-jañg ā.īna

tere shahr kā qissa mere shahr kī gāthā

saaf saaf dhuñdhlāhaT zañg zañg ā.īna

koī sā bhī paikar ho is ko Dar nahīñ lagtā

kyuuñ ki apnī fitrat se hai dabañg ā.īna

mushtahar huiiñ jab bhī ujlī ḳhvāhisheñ 'parvez'

kholtā nazar aayā añg añg ā.īna

tere sath chehre hain mere sang aaina

dekh aaj hota hai kis pe tang aaina

bol KHud-shanasi phir kis tarah se mumkin ho

pesh kar raha ho jab sat rang aaina

KHud-parastiyon ne bhi KHub raushni baKHshi

ban gaya andheron mein ek sang aaina

laKHt-laKHt aawazen fard fard pahchanen

shor shor KHamoshi wajh-e-jang aaina

tere shahr ka qissa mere shahr ki gatha

saf saf dhundhlahaT zang zang aaina

koi sa bhi paikar ho is ko Dar nahin lagta

kyun ki apni fitrat se hai dabang aaina

mushtahar huin jab bhi ujli KHwahishen 'parwez'

kholta nazar aaya ang ang aaina