tere wade ka iKHtitam nahin

tere va.ade kā iḳhtitām nahīñ

ki qayāmat pe bhī qayām nahīñ

bevafā.ī tumhārī aam huī

ab kisī ko kisī se kaam nahīñ

kis liye da.ava-e-zuleḳhā.ī

ġhair yūsuf nahīñ ġhulām nahīñ

vasl ke ba.ad hijr kā kyā kaam

duur gardūñ kā intizām nahīñ

kaun suntā hai nāla-o-fariyād

charḳh ko ḳhauf-e-intiqām nahīñ

ḳhāl-e-lab dekh kar huā ma.alūm

koī daana baġhair-e-dām nahīñ

aap meñ kyuuñ ki aa.uuñ jab ki tū aa.e

ḳhalvat-e-ḳhās bazm-e-ām nahīñ

naala kartā huuñ log sunte haiñ

aap se merā kuchh kalām nahīñ

jis jagah hai vahāñ bhī hai bohtān

ki kisī jā tirā maqām nahīñ

roz-e-furqat ko roz-e-hashr na jaan

shaam par bhī to iḳhtitām nahīñ

hai ḳhudā hī 'qalaq' jo aaj bujhe

sub.h hote nahīñ ki shaam nahīñ

tere wade ka iKHtitam nahin

ki qayamat pe bhi qayam nahin

bewafai tumhaari aam hui

ab kisi ko kisi se kaam nahin

kis liye dawa-e-zuleKHai

ghair yusuf nahin ghulam nahin

wasl ke baad hijr ka kya kaam

dur gardun ka intizam nahin

kaun sunta hai nala-o-fariyaad

charKH ko KHauf-e-intiqam nahin

KHal-e-lab dekh kar hua malum

koi dana baghair-e-dam nahin

aap mein kyun ki aaun jab ki tu aae

KHalwat-e-KHas bazm-e-am nahin

nala karta hun log sunte hain

aap se mera kuchh kalam nahin

jis jagah hai wahan bhi hai bohtan

ki kisi ja tera maqam nahin

roz-e-furqat ko roz-e-hashr na jaan

sham par bhi to iKHtitam nahin

hai KHuda hi 'qalaq' jo aaj bujhe

subh hote nahin ki sham nahin