teri jafa ka gham hai magar itna gham nahin

terī jafā kā ġham hai magar itnā ġham nahīñ

mar jaa.eñ tere vāste pāgal to ham nahīñ

'ishq-o-junūñ meñ hausla majnūñ se kam nahīñ

sahrā kī musht-e-ḳhāk se ghabrāte ham nahīñ

dast-e-raqīb meñ diye us ne badan ke ḳham

chhū paa.e ham to reshmī zulfoñ ke ḳham nahīñ

āñkhoñ meñ bhar ke laayā thā manzar jo des ke

pardes ke ḳharāboñ meñ jannat se kam nahīñ

chakkhī hai us ne jab se mire 'ishq kī miThās

amrat sā ab zabāñ meñ hai pahle sā sam nahīñ

nafrat daġhā fareb jafā āshnā.iyāñ

kyā kyā sitam-shi'ār ne toḌe sitam nahīñ

likkheñge she'r she'r meñ jurm-e-jafā tirā

dil hai do-laḳht haath hamāre qalam nahīñ

ḳhanjar jafā kā siine meñ mere utaar kar

aayā zarā bhī chashm-e-sitamgar meñ nam nahīñ

jaur-o-jafā 'sahāb' pe Dhaa.e vo roz-o-shab

bhūle se bhī 'ināyat-e-lutf-o-karam nahīñ

teri jafa ka gham hai magar itna gham nahin

mar jaen tere waste pagal to hum nahin

'ishq-o-junun mein hausla majnun se kam nahin

sahra ki musht-e-KHak se ghabraate hum nahin

dast-e-raqib mein diye us ne badan ke KHam

chhu pae hum to reshmi zulfon ke KHam nahin

aankhon mein bhar ke laya tha manzar jo des ke

pardes ke KHarabon mein jannat se kam nahin

chakkhi hai us ne jab se mere 'ishq ki miThas

amrat sa ab zaban mein hai pahle sa sam nahin

nafrat dagha fareb jafa aashnaiyan

kya kya sitam-shi'ar ne toDe sitam nahin

likkhenge she'r she'r mein jurm-e-jafa tera

dil hai do-laKHt hath hamare qalam nahin

KHanjar jafa ka sine mein mere utar kar

aaya zara bhi chashm-e-sitamgar mein nam nahin

jaur-o-jafa 'sahab' pe Dhae wo roz-o-shab

bhule se bhi 'inayat-e-lutf-o-karam nahin