teri jamaliyat se aage nikal gae

terī jamāliyāt se aage nikal ga.e

ham his-o-hissiyāt se aage nikal ga.e

apne kisī jazīre pe ii.deñ manāeñge

ham terī chāñd-rāt se aage nikal ga.e

likkhī huī haiñ chehroñ pe saarī kasāfateñ

ab chehre vāqi.āt se aage nikal ga.e

ab har jagah pe gaate haiñ aur nāchte haiñ log

ab ye tave parāt se aage nikal ga.e

muñh-zor pāniyoñ kī ġhizā ban ga.e vo log

jo kashtī-e-najāt se aage nikal ga.e

jo dil kahegā ab vo kareñge suno suno

ham vaz-e-ehtiyāt se aage nikal ga.e

jo tujh ko kā.enāt samajhte the aaj tak

vo terī kā.enāt se aage nikal ga.e

teri jamaliyat se aage nikal gae

hum his-o-hissiyat se aage nikal gae

apne kisi jazire pe iden manaenge

hum teri chand-raat se aage nikal gae

likkhi hui hain chehron pe sari kasafaten

ab chehre waqiat se aage nikal gae

ab har jagah pe gate hain aur nachte hain log

ab ye tawe paraat se aage nikal gae

munh-zor paniyon ki ghiza ban gae wo log

jo kashti-e-najat se aage nikal gae

jo dil kahega ab wo karenge suno suno

hum waz-e-ehtiyat se aage nikal gae

jo tujh ko kaenat samajhte the aaj tak

wo teri kaenat se aage nikal gae