teri mansha hai KHamoshi meri hai marzi aawaz

terī manshā hai ḳhāmoshī merī hai marzī āvāz

aao mil kar aaj banā.eñ ham koī farzī āvāz

chhāgal bhī labrez hai ab to lekin merī gūñgī pyaas

terī ok se piinā chāhe ThanDe chashme kī āvāz

kis kī ho zarḳhez samā.at kis kī banjar kyā ma.alūm

bhaTke har ik samt TaTole har rasta andhī āvāz

dil se lab tak aate aate lafz badal jaate haiñ ab

pahle aa jaatī thī hoñToñ par ḳhālis sachchī āvāz

ek se haiñ ādāb zabāñ-bandī ke har ik mahfil meñ

sabr kā jaam uThā ai dil aur ḳhāmoshī se pī āvāz

uzr usuul javāz ke charḳhe kaat rahā hai har koī

tū bhī apnī majbūrī kā dhāgā le aur sī āvāz

vahī musalsal beach hamāre ek masāfat kī duurī

vaise har ik moḌ pe ruk ke us ne ham ko dī āvāz

zer-e-lab kuchh maañg rahe the sab kashkol liye jis se

us ne pheñkī mere kaase meñ sab se ūñchī āvāz

soch rahī huuñ naam pe apne chauñk ke pīchhe muḌte hue

vahm thā merā yā phir sach-much terī hī vo thī āvāz

gahrī ḳhāmoshī meñ bahte be-ābād jazīroñ se

kis ne merā naam pukārā kis ne mujh ko dī āvāz

teri mansha hai KHamoshi meri hai marzi aawaz

aao mil kar aaj banaen hum koi farzi aawaz

chhagal bhi labrez hai ab to lekin meri gungi pyas

teri ok se pina chahe ThanDe chashme ki aawaz

kis ki ho zarKHez samaat kis ki banjar kya malum

bhaTke har ek samt TaTole har rasta andhi aawaz

dil se lab tak aate aate lafz badal jate hain ab

pahle aa jati thi honTon par KHalis sachchi aawaz

ek se hain aadab zaban-bandi ke har ek mahfil mein

sabr ka jam uTha ai dil aur KHamoshi se pi aawaz

uzr usul jawaz ke charKHe kat raha hai har koi

tu bhi apni majburi ka dhaga le aur si aawaz

wahi musalsal beach hamare ek masafat ki duri

waise har ek moD pe ruk ke us ne hum ko di aawaz

zer-e-lab kuchh mang rahe the sab kashkol liye jis se

us ne phenki mere kase mein sab se unchi aawaz

soch rahi hun nam pe apne chaunk ke pichhe muDte hue

wahm tha mera ya phir sach-much teri hi wo thi aawaz

gahri KHamoshi mein bahte be-abaad jaziron se

kis ne mera nam pukara kis ne mujh ko di aawaz