teri nazar ka rang bahaaron ne le liya

terī nazar kā rañg bahāroñ ne le liyā

afsurdagī kā ruup tarānoñ ne le liyā

jis ko bharī bahār meñ ġhunche na kah sake

vo vāqi.a bhī mere fasānoñ ne le liyā

shāyad milegā qariya-e-mahtāb meñ sukūñ

ahl-e-ḳhirad ko aise gumānoñ ne le liyā

yazdāñ se bach rahā thā jalālat kā ek lafz

us ko haram ke shoḳh bayānoñ ne le liyā

terī adā se ho na sakā jis kā faisla

vo zindagī kā raaz nishānoñ ne le liyā

afsāna-e-hayāt kī takmīl ho ga.ī

apnoñ ne le liyā ki begānoñ ne le liyā

bhūlī nahīñ vo qaus-e-quzah kī sī sūrateñ

'sāġhar' tumheñ to mast dhiyānoñ ne le liyā

teri nazar ka rang bahaaron ne le liya

afsurdagi ka rup taranon ne le liya

jis ko bhari bahaar mein ghunche na kah sake

wo waqia bhi mere fasanon ne le liya

shayad milega qariya-e-mahtab mein sukun

ahl-e-KHirad ko aise gumanon ne le liya

yazdan se bach raha tha jalalat ka ek lafz

us ko haram ke shoKH bayanon ne le liya

teri ada se ho na saka jis ka faisla

wo zindagi ka raaz nishanon ne le liya

afsana-e-hayat ki takmil ho gai

apnon ne le liya ki beganon ne le liya

bhuli nahin wo qaus-e-quzah ki si suraten

'saghar' tumhein to mast dhiyanon ne le liya