teri taskin ka sabab kaun-o-makan hai ki nahin

terī taskīñ kā sabab kaun-o-makāñ hai ki nahīñ

rūh-parvar ye jahān-e-guzarāñ hai ki nahīñ

din kī zau-tābiyāñ tārīk fazā.eñ shab kī

pichhlī rātoñ ke dhuñdalke se ayaañ hai ki nahīñ

nāra-e-dār-o-rasan hādisa-e-kaun-o-makāñ

ḳhufta-jānoñ ke liye ḳhvāb-e-girāñ hai ki nahīñ

ḳhud ḳham-o-pech tujhe raah ke batlā deñge

terī Thokar meñ tirā sūd-o-ziyāñ hai ki nahīñ

terī zulfeñ tirā ruḳh terī jabīñ terī nazar

ye chaman ā.ina-e-dīda-varāñ hai ki nahīñ

is nazar se vo mujhe dekhte rahte haiñ 'kalīm'

garm ḳhuuñ garm nafas garm-e-fuġhāñ hai ki nahīñ

teri taskin ka sabab kaun-o-makan hai ki nahin

ruh-parwar ye jahan-e-guzaran hai ki nahin

din ki zau-tabiyan tarik fazaen shab ki

pichhli raaton ke dhundalke se ayan hai ki nahin

nara-e-dar-o-rasan hadisa-e-kaun-o-makan

KHufta-jaanon ke liye KHwab-e-giran hai ki nahin

KHud KHam-o-pech tujhe rah ke batla denge

teri Thokar mein tera sud-o-ziyan hai ki nahin

teri zulfen tera ruKH teri jabin teri nazar

ye chaman aaina-e-dida-waran hai ki nahin

is nazar se wo mujhe dekhte rahte hain 'kalim'

garm KHun garm nafas garm-e-fughan hai ki nahin