tewar tumhaare dekh kar aadha suKHan karun

tevar tumhāre dekh kar aadhā suḳhan karūñ

varna maiñ chāhtā huuñ ziyāda suḳhan karūñ

mujh ko mirī ġhazal kā chamaknā pasand hai

puurā karūñ ye nek irāda suḳhan karūñ

ḳhāmoshī dab na jaa.e ma.ānī ke bojh se

āhista us kī pusht pe laadā suḳhan karūñ

ye kam numū charāġh mujhe dekhte raheñ

jab bād-e-tund se sar-e-jāda suḳhan karūñ

jo baat mere dil meñ hai sab ko patā chale

aksar ye sochtā huuñ ki saada suḳhan karūñ

merā kamāl ye hai bisāt-e-kamāl par

shāhoñ ke rū-ba-rū maiñ piyāda suḳhan karūñ

maiñ ik qadīm matn kī sūrat likhā huā

pahnūñ hurūf-e-nau kā labāda suḳhan karūñ

ye shā.erī hai koī tijārat nahīñ janāb

tuf hai agar barā.e-ifāda suḳhan karūñ

'yāvar' maiñ koī shā.ir-e-kam-hausla nahīñ

jo dekh kar zamīn kushāda suḳhan karūñ

tewar tumhaare dekh kar aadha suKHan karun

warna main chahta hun ziyaada suKHan karun

mujh ko meri ghazal ka chamakna pasand hai

pura karun ye nek irada suKHan karun

KHamoshi dab na jae maani ke bojh se

aahista us ki pusht pe lada suKHan karun

ye kam numu charagh mujhe dekhte rahen

jab baad-e-tund se sar-e-jada suKHan karun

jo baat mere dil mein hai sab ko pata chale

aksar ye sochta hun ki sada suKHan karun

mera kamal ye hai bisat-e-kamal par

shahon ke ru-ba-ru main piyaada suKHan karun

main ek qadim matn ki surat likha hua

pahnun huruf-e-nau ka labaada suKHan karun

ye shaeri hai koi tijarat nahin janab

tuf hai agar barae-ifada suKHan karun

'yawar' main koi shair-e-kam-hausla nahin

jo dekh kar zamin kushada suKHan karun