tez hai pine mein ho jaegi aasani mujhe

tez hai piine meñ ho jā.egī āsānī mujhe

zamzamī se de de zāhid to zarā paanī mujhe

dekhnā nāzuk bhī haiñ kamsin bhī haiñ bhole bhī haiñ

shaam se samjhā rahī hai un kī nādānī mujhe

baat bigḌī vasl meñ bigḌī jo tū ai zulf-e-yār

kuchh pareshānī tujhe hai kuchh pareshānī mujhe

haath uThā kar rah ga.e āñkheñ jhukā kar rah ga.e

teġh-e-uryāñ kī pasand aa.ī jo uryānī mujhe

ban gayā huuñ aa.ina ai jalva-hā-e-barq-e-tūr

mil ga.ī hai un kī ā.īne kī hairānī mujhe

aap use darbāñ batā.eñ uzr mujh ko kuchh nahīñ

sauñpiye ghar ġhair ko apnī nigahbānī mujhe

ḳhuub rotā huuñ bagūloñ se lipaT kar dasht meñ

yaad aatī hai jo apne ghar kī vīrānī mujhe

fasl-e-gul meñ rañg laayā hai shabāb-e-duḳht-e-raz

chheḌtī hai aa ke rātoñ ko ye mastānī mujhe

bol uThā joban kisī se bhī nahīñ dabne kā maiñ

sauñpiye sarkār ab apnī nigahbānī mujhe

raaz sar-basta rahā kab chāk-dāmānī kā haal

ai sabā dikhlā na apnī pāk-dāmānī mujhe

vaa.e qismat paḌ ga.ī kaisī girah-e-taqdīr meñ

uqda-e-mushkil nazar aatī hai āsānī mujhe

ab kahāñ taqdīr meñ haiñ ghūñT shahd-o-shīr ke

yaad aatī hai kisī shai kī farāvānī mujhe

chashm-e-rahm ai sāqī-e-kausar ki ab miltā nahīñ

tishnagān-e-karbalā ke naam par paanī mujhe

shāh-e-daurāñ hazrat-e-'hāmid'-alī-ḳhāñ ke sivā

kaun hai jis kī tavajjoh se ho āsānī mujhe

roz-afzūñ ho taraqqī daulat-o-iqbāl kī

aur mil jaa.e dar-e-daulat kī darbānī mujhe

chāhtā hai qais se achchhī rahe shakl-e-'riyāz'

ban chukā maiñ kyuuñ banātā hai are maanī mujhe

tez hai pine mein ho jaegi aasani mujhe

zamzami se de de zahid to zara pani mujhe

dekhna nazuk bhi hain kamsin bhi hain bhole bhi hain

sham se samjha rahi hai un ki nadani mujhe

baat bigDi wasl mein bigDi jo tu ai zulf-e-yar

kuchh pareshani tujhe hai kuchh pareshani mujhe

hath uTha kar rah gae aankhen jhuka kar rah gae

tegh-e-uryan ki pasand aai jo uryani mujhe

ban gaya hun aaina ai jalwa-ha-e-barq-e-tur

mil gai hai un ki aaine ki hairani mujhe

aap use darban bataen uzr mujh ko kuchh nahin

saunpiye ghar ghair ko apni nigahbani mujhe

KHub rota hun bagulon se lipaT kar dasht mein

yaad aati hai jo apne ghar ki virani mujhe

fasl-e-gul mein rang laya hai shabab-e-duKHt-e-raz

chheDti hai aa ke raaton ko ye mastani mujhe

bol uTha joban kisi se bhi nahin dabne ka main

saunpiye sarkar ab apni nigahbani mujhe

raaz sar-basta raha kab chaak-damani ka haal

ai saba dikhla na apni pak-damani mujhe

wae qismat paD gai kaisi girah-e-taqdir mein

uqda-e-mushkil nazar aati hai aasani mujhe

ab kahan taqdir mein hain ghunT shahd-o-shir ke

yaad aati hai kisi shai ki farawani mujhe

chashm-e-rahm ai saqi-e-kausar ki ab milta nahin

tishnagan-e-karbala ke nam par pani mujhe

shah-e-dauran hazrat-e-'hamid'-ali-KHan ke siwa

kaun hai jis ki tawajjoh se ho aasani mujhe

roz-afzun ho taraqqi daulat-o-iqbaal ki

aur mil jae dar-e-daulat ki darbani mujhe

chahta hai qais se achchhi rahe shakl-e-'riyaz'

ban chuka main kyun banata hai are mani mujhe