tha aaine ke samne chehra khula hua

thā aa.ine ke sāmne chehra khulā huā

paanī pe jaise chāñd kā saaya paḌā huā

ghultī ga.ī badan meñ tamāzat sharāb kī

sāġhar nigāh kā thā labālab bharā huā

kal raat thoḌī der ko palkeñ jhapak ga.iiñ

jaagā to joḌ joḌ thā apnā dukhā huā

shāyad ki so ga.e haiñ bahut thak ke dil-jale

shahr-e-junūñ tamām hai suunā paḌā huā

tahzīb DhūñDhtī hai kisī irtiqā kī shakl

iqbāl-mandiyoñ kā hai sūraj Dhalā huā

dil kā vajūd ġham ke añdhere meñ kho gayā

jaise kisī mazār kā katba miTā huā

kāñdhe pe Dho rahā huuñ ga.e vaqt kī salīb

kāñToñ kā taaj sar pe hai apne rakhā huā

ġharqāb ho na jaa.e kahīñ zabt kā jahāñ

phir aaj dard-e-dil kā hai dariyā chaḌhā huā

hālat na ab 'shamīm' kī pūchho ki vo ġharīb

hogā kisī galī meñ tamāshā banā huā

tha aaine ke samne chehra khula hua

pani pe jaise chand ka saya paDa hua

ghulti gai badan mein tamazat sharab ki

saghar nigah ka tha labaalab bhara hua

kal raat thoDi der ko palken jhapak gain

jaga to joD joD tha apna dukha hua

shayad ki so gae hain bahut thak ke dil-jale

shahr-e-junun tamam hai suna paDa hua

tahzib DhunDhti hai kisi irtiqa ki shakl

iqbaal-mandiyon ka hai suraj Dhala hua

dil ka wajud gham ke andhere mein kho gaya

jaise kisi mazar ka katba miTa hua

kandhe pe Dho raha hun gae waqt ki salib

kanTon ka taj sar pe hai apne rakha hua

gharqab ho na jae kahin zabt ka jahan

phir aaj dard-e-dil ka hai dariya chaDha hua

haalat na ab 'shamim' ki puchho ki wo gharib

hoga kisi gali mein tamasha bana hua