tha abas KHauf ki aaseb-e-guman main hi tha

thā abas ḳhauf ki āseb-e-gumāñ maiñ hī thā

mujh meñ saaya sā koī aur kahāñ maiñ hī thā

sab ne dekhā thā kuchh uThtā huā mere ghar se

phailtā aur bikhartā vo dhuāñ maiñ hī thā

sach thā vo zahr gavārā hī kisī ko na huā

talḳhī-e-zā.iqa-e-kām-o-ziyāñ maiñ hī thā

ḳhud hī pyāsā thā bhalā pyaas bujhātā kis kī

sar pe sūraj ko liye abr-e-ravāñ maiñ hī thā

dar pe ik qufl-e-pur-asrār paḌā thā 'farruḳh'

bhed khultā bhī to kaise ki makāñ maiñ hī thā

tha abas KHauf ki aaseb-e-guman main hi tha

mujh mein saya sa koi aur kahan main hi tha

sab ne dekha tha kuchh uThta hua mere ghar se

phailta aur bikharta wo dhuan main hi tha

sach tha wo zahr gawara hi kisi ko na hua

talKHi-e-zaiqa-e-kaam-o-ziyan main hi tha

KHud hi pyasa tha bhala pyas bujhata kis ki

sar pe suraj ko liye abr-e-rawan main hi tha

dar pe ek qufl-e-pur-asrar paDa tha 'farruKH'

bhed khulta bhi to kaise ki makan main hi tha