tha harf-e-shauq said hua kaun le gaya

thā harf-e-shauq said huā kaun le gayā

maiñ jis ko sun sakūñ vo sadā kaun le gayā

ik maiñ hī jāma-posh thā uryāniyoñ ke biich

mujh se mirī abā o qabā kaun le gayā

ehsās bikhrā bikhrā sā haarā huā badan

chaḌhtī harārtoñ kā nasha kaun le gayā

bātoñ kā husn hai na kahīñ shoḳhi-e-bayāñ

shahr-e-navā se harf o sadā kaun le gayā

maiñ kab se huuñ asiir sarāboñ ke jaal meñ

niile samundaroñ pe ghaTā kaun le gayā

mai-ḳhāna chhoḌ ghar kī fazāoñ meñ aa ga.e

ham se matā-e-laġhzish-e-pā kaun le gayā

maiñ jab na thā to mujh pe bahut qahqahe lage

ahbāb se sirisht-e-vafā kaun le gayā

tha harf-e-shauq said hua kaun le gaya

main jis ko sun sakun wo sada kaun le gaya

ek main hi jama-posh tha uryaniyon ke bich

mujh se meri aba o qaba kaun le gaya

ehsas bikhra bikhra sa haara hua badan

chaDhti hararton ka nasha kaun le gaya

baaton ka husn hai na kahin shoKHi-e-bayan

shahr-e-nawa se harf o sada kaun le gaya

main kab se hun asir sarabon ke jal mein

nile samundaron pe ghaTa kaun le gaya

mai-KHana chhoD ghar ki fazaon mein aa gae

hum se mata-e-laghzish-e-pa kaun le gaya

main jab na tha to mujh pe bahut qahqahe lage

ahbab se sirisht-e-wafa kaun le gaya