tha main aaKHir usi mausam ki faza mein pahle

thā maiñ āḳhir usī mausam kī fazā meñ pahle

is qadar soz na thā merī navā meñ pahle

hai agar us kī ye hasrat ki use sab dekheñ

shāhid-e-charḳh ho rū-posh ghaTā meñ pahle

ḳhāk-poshoñ ke badan der meñ lau dete haiñ

aag lagtī hai kisī narm qabā meñ pahle

hoñT siinā bhī hai ab farz chalo ye bhī sahī

aisī sharteñ na thiiñ ādāb-e-vafā meñ pahle

ahl-e-fan us ko na bhūleñ ki dil o jaañ kī tapish

harf meñ ba.ad ko aatī hai sadā meñ pahle

mere arsa-gah-e-taqdīr meñ aane vaalo

din guzāro kisī āshob-sarā meñ pahle

mere sahrā meñ tum aa.e to ho nāzuk-nafaso

saañs bhī lī hai kabhī aisī havā meñ pahle

tha main aaKHir usi mausam ki faza mein pahle

is qadar soz na tha meri nawa mein pahle

hai agar us ki ye hasrat ki use sab dekhen

shahid-e-charKH ho ru-posh ghaTa mein pahle

KHak-poshon ke badan der mein lau dete hain

aag lagti hai kisi narm qaba mein pahle

honT sina bhi hai ab farz chalo ye bhi sahi

aisi sharten na thin aadab-e-wafa mein pahle

ahl-e-fan us ko na bhulen ki dil o jaan ki tapish

harf mein baad ko aati hai sada mein pahle

mere arsa-gah-e-taqdir mein aane walo

din guzaro kisi aashob-sara mein pahle

mere sahra mein tum aae to ho nazuk-nafaso

sans bhi li hai kabhi aisi hawa mein pahle