tha pa-shikasta aankh magar dekhti to thi

thā pā-shikasta aañkh magar dekhtī to thī

maanā vo be-amal thā magar āgahī to thī

ilzām-e-nārasī se mubarrā nahīñ thī siip

lekin kisī ke shauq meñ Duubī huī to thī

maanā vo dasht-e-shauq meñ pyāsā hī mar gayā

ik jhiil justujū kī pas-e-tishnagī to thī

ehsās par muhīt the lafzoñ ke dā.ere

lafzoñ ke dā.eroñ meñ magar zindagī to thī

vīrāñ thā sehn-e-bāġh magar is qadar na thā

kone meñ sūkhe pattoñ kī mahfil jamī to thī

ġham duur kar ke aur bhī maflūj kar diyā

tanhā.iyoñ kī raat meñ dil-bastagī to thī

is ThanDī raat meñ to añdhere kā raaj hai

sūraj jalā rahā thā magar raushnī to thī

tha pa-shikasta aankh magar dekhti to thi

mana wo be-amal tha magar aagahi to thi

ilzam-e-narasi se mubarra nahin thi sip

lekin kisi ke shauq mein Dubi hui to thi

mana wo dasht-e-shauq mein pyasa hi mar gaya

ek jhil justuju ki pas-e-tishnagi to thi

ehsas par muhit the lafzon ke daere

lafzon ke daeron mein magar zindagi to thi

viran tha sehn-e-bagh magar is qadar na tha

kone mein sukhe patton ki mahfil jami to thi

gham dur kar ke aur bhi mafluj kar diya

tanhaiyon ki raat mein dil-bastagi to thi

is ThanDi raat mein to andhere ka raj hai

suraj jala raha tha magar raushni to thi