Thahar ke dekh tu is KHak se kya kya nikal aaya

Thahar ke dekh tū is ḳhaak se kyā kyā nikal aayā

mirī pur-gard peshānī se bhī sajda nikal aayā

kahīñ pīpal uge haiñ tīsrī manzil ke chhajje par

kahīñ khiḌkī kī chaukhaT se koī qabza nikal aayā

hamārā rāsta to ilm kā thā justujū kā thā

na jaane kaun se raste se ye rasta nikal aayā

to kyā har ilm mushkil kī badaulat sīkhte haiñ ham

jahāñ dushvāriyāñ pahuñchīñ vahīñ rasta nikal aayā

ḳhudā jaane ye ilm-e-hai.at-e-ashyā kahāñ Thahre

jise unsur sā samjhā thā murkkab sā nikal aayā

ye manzil qaid-ḳhāna lag rahī thī kuchh dinoñ pahle

aur ab is qaid-ḳhāne kā bhī darvāza nikal aayā

bahut nazdīk aane kā bahāna mil gayā ham ko

tumhārā aur merā duur kā rishta nikal aayā

kisī ke ā.īna-ḳhāne meñ apnā aks bhī gum hai

kisī ke ā.īñe meñ ā.īna-ḳhāna nikal aayā

yahāñ tak maiñ baḌī mushkil baḌī koshish se pahuñchā thā

magar sandūq kholā to nayā naqsha nikal aayā

tumhāre shahr kī saḌkeñ bhī bārish dho ga.ī hogī

hamāre gaañv kī galiyoñ meñ to sabza nikal aayā

Thahar ke dekh tu is KHak se kya kya nikal aaya

meri pur-gard peshani se bhi sajda nikal aaya

kahin pipal uge hain tisri manzil ke chhajje par

kahin khiDki ki chaukhaT se koi qabza nikal aaya

hamara rasta to ilm ka tha justuju ka tha

na jaane kaun se raste se ye rasta nikal aaya

to kya har ilm mushkil ki badaulat sikhte hain hum

jahan dushwariyan pahunchin wahin rasta nikal aaya

KHuda jaane ye ilm-e-haiat-e-ashya kahan Thahre

jise unsur sa samjha tha murkkab sa nikal aaya

ye manzil qaid-KHana lag rahi thi kuchh dinon pahle

aur ab is qaid-KHane ka bhi darwaza nikal aaya

bahut nazdik aane ka bahana mil gaya hum ko

tumhaara aur mera dur ka rishta nikal aaya

kisi ke aaina-KHane mein apna aks bhi gum hai

kisi ke aaine mein aaina-KHana nikal aaya

yahan tak main baDi mushkil baDi koshish se pahuncha tha

magar sanduq khola to naya naqsha nikal aaya

tumhaare shahr ki saDken bhi barish dho gai hogi

hamare ganw ki galiyon mein to sabza nikal aaya