Thahar ke dekhte hum raston ke manzar bhi

Thahar ke dekhte ham rāstoñ ke manzar bhī

jo tez dhuup na hotī hamāre sar par bhī

badal sakā na makānoñ kī kohnagī kā mizāj

vahī fazā rahī dīvār-o-dar sajā kar bhī

maiñ is qadar huā apnā ki ye bhī bhuul gayā

basī huī koī duniyā hai mere bāhar bhī

shikast-o-fat.h mire saath saath chaltī hai

maiñ apne 'ahd kā poras bhī huuñ sikandar bhī

ye sar kā taaj mirī āḳhirī shanāḳht nahīñ

ki merī zaat meñ pinhāñ hai ik gadāgar bhī

vahāñ bhī mujh ko nazar aa gayā harīf mirā

Talā na ḳhatra-e-jāñ rāsta badal kar bhī

karūñ maiñ zāhirī manzar kā kyā gila 'manzar'

mile haiñ mujh ko añdhere diloñ ke andar bhī

Thahar ke dekhte hum raston ke manzar bhi

jo tez dhup na hoti hamare sar par bhi

badal saka na makanon ki kohnagi ka mizaj

wahi faza rahi diwar-o-dar saja kar bhi

main is qadar hua apna ki ye bhi bhul gaya

basi hui koi duniya hai mere bahar bhi

shikast-o-fath mere sath sath chalti hai

main apne 'ahd ka poras bhi hun sikandar bhi

ye sar ka taj meri aaKHiri shanaKHt nahin

ki meri zat mein pinhan hai ek gadagar bhi

wahan bhi mujh ko nazar aa gaya harif mera

Tala na KHatra-e-jaan rasta badal kar bhi

karun main zahiri manzar ka kya gila 'manzar'

mile hain mujh ko andhere dilon ke andar bhi