Thahre to kahan Thahre aaKHir meri binai

Thahre to kahāñ Thahre āḳhir mirī bīnā.ī

har shaḳhs tamāshā hai har shaḳhs tamāshā.ī

ye husn kā dhokā bhī dil ke liye kaafī thā

chhūne ke liye kab thī mahtāb kī ūñchā.ī

ā.īne kī hājat se inkār nahīñ lekin

is darja na thā pahle dastūr-e-ḳhud-ārā.ī

sarmāya-e-dil āḳhir aur is ke sivā kyā hai

har dard se rishta hai har ġham se shanāsā.ī

patthar sā haTe dil se kuchh mujh ko bhī kahne do

go talḳh to guzregī tum ko mirī sachchā.ī

shikva na kareñ ham bhī bharpūr tavajjoh kā

dekhā na karo tum bhī har zaḳhm kī gahrā.ī

duniyā se nirālā hai 'asrār' chalan apnā

tanhā.ī meñ mahfil hai mahfil meñ hai tanhā.ī

Thahre to kahan Thahre aaKHir meri binai

har shaKHs tamasha hai har shaKHs tamashai

ye husn ka dhoka bhi dil ke liye kafi tha

chhune ke liye kab thi mahtab ki unchai

aaine ki hajat se inkar nahin lekin

is darja na tha pahle dastur-e-KHud-arai

sarmaya-e-dil aaKHir aur is ke siwa kya hai

har dard se rishta hai har gham se shanasai

patthar sa haTe dil se kuchh mujh ko bhi kahne do

go talKH to guzregi tum ko meri sachchai

shikwa na karen hum bhi bharpur tawajjoh ka

dekha na karo tum bhi har zaKHm ki gahrai

duniya se nirala hai 'asrar' chalan apna

tanhai mein mahfil hai mahfil mein hai tanhai