thak ke baiTha tha ki manzil nazar aai mujhko

thak ke baiThā thā ki manzil nazar aa.ī mujh ko

hausla dene lagī ābla-pā.ī mujh ko

nazr kar dete haiñ vo apnī kamā.ī mujh ko

sar uThāne nahīñ dete mire bhaa.ī mujh ko

maiñ jahāñ jaatā huuñ is paikar-e-nūrī ke sivā

aur kuchh bhī nahīñ detā hai dikhā.ī mujh ko

is sitam-pesha ne qurbat kā na marham rakkhā

'umr-bhar detā rahā zaḳhm-e-judā.ī mujh ko

mushkiloñ meñ bhī mire hausle shādāb rahe

rok saktī hī nahīñ vaqt kī khaa.ī mujh ko

maiñ to har saañs ko detā rahā jiine kā ḳhirāj

zindagī phir bhī kabhī raas na aa.ī mujh ko

us se barham maiñ nahīñ phir bhī magar merā harīf

'umr-bhar detā rahā apnī safā.ī mujh ko

tere aane kī ḳhabar ne mujhe bechain rakhā

so gayā chāñd magar niiñd na aa.ī mujh ko

isī ummīd pe marmar ke jiye jaatā huuñ

vo mirī qaid se kab degā rihā.ī mujh ko

mujh se kuchh sunñe pe āmāda na thī ḳhalq-e-ḳhudā

'umr-bhar us ne magar apnī sunā.ī mujh ko

ik na.e ġham se shanāsā kiyā mahrūmī ne

zindagī jab bhī tirī bazm meñ laa.ī mujh ko

vo bhī sharminda nazar aatā hai 'nūrī' aksar

nazar aatī hī nahīñ jis meñ burā.ī mujh ko

thak ke baiTha tha ki manzil nazar aai mujh ko

hausla dene lagi aabla-pai mujh ko

nazr kar dete hain wo apni kamai mujh ko

sar uThane nahin dete mere bhai mujh ko

main jahan jata hun is paikar-e-nuri ke siwa

aur kuchh bhi nahin deta hai dikhai mujh ko

is sitam-pesha ne qurbat ka na marham rakkha

'umr-bhar deta raha zaKHm-e-judai mujh ko

mushkilon mein bhi mere hausle shadab rahe

rok sakti hi nahin waqt ki khai mujh ko

main to har sans ko deta raha jine ka KHiraj

zindagi phir bhi kabhi ras na aai mujh ko

us se barham main nahin phir bhi magar mera harif

'umr-bhar deta raha apni safai mujh ko

tere aane ki KHabar ne mujhe bechain rakha

so gaya chand magar nind na aai mujh ko

isi ummid pe marmar ke jiye jata hun

wo meri qaid se kab dega rihai mujh ko

mujh se kuchh sunne pe aamada na thi KHalq-e-KHuda

'umr-bhar us ne magar apni sunai mujh ko

ek nae gham se shanasa kiya mahrumi ne

zindagi jab bhi teri bazm mein lai mujh ko

wo bhi sharminda nazar aata hai 'nuri' aksar

nazar aati hi nahin jis mein burai mujh ko