thak ke baiThun to mujhe rasta nazar aaega

thak ke baiThūñ to mujhe rasta nazar aa.egā

shaam is dasht meñ guzregī to ghar aa.egā

soch kar merī mohabbat meñ qadam rakhnā tum

is se aage to bahut lambā safar aa.egā

muntazir āñkheñ kisī taaq meñ bujh jā.eñgī

koī hogā hī nahīñ koī agar aa.egā

siikh jā.ūñgā tire ba.ad bhī jiinā lekin

mujh ko ai dost tire hijr se Dar aa.egā

mujh tak aate hue duniyā use rokegī bahut

ruk bhī jā.egā kisī raah meñ par aa.egā

umr ke din to isī aas meñ kaT jaate haiñ

raat Dhal jā.egī aur vaqt-e-sahar aa.egā

vaqt kī qaid se āzād mah-o-sāl se duur

ik zamāna hai ki jo bār-e-digar aa.egā

thak ke baiThun to mujhe rasta nazar aaega

sham is dasht mein guzregi to ghar aaega

soch kar meri mohabbat mein qadam rakhna tum

is se aage to bahut lamba safar aaega

muntazir aankhen kisi taq mein bujh jaengi

koi hoga hi nahin koi agar aaega

sikh jaunga tere baad bhi jina lekin

mujh ko ai dost tere hijr se Dar aaega

mujh tak aate hue duniya use rokegi bahut

ruk bhi jaega kisi rah mein par aaega

umr ke din to isi aas mein kaT jate hain

raat Dhal jaegi aur waqt-e-sahar aaega

waqt ki qaid se aazad mah-o-sal se dur

ek zamana hai ki jo bar-e-digar aaega