thakan ka bojh badan se utarte hain hum

thakan kā bojh badan se utārte haiñ ham

ye shaam aur kahīñ par guzārte haiñ ham

qadam zamīn pe rakkhe hameñ zamāna huā

so āsmān se ḳhud ko utārte haiñ ham

hamārī ruuh kā hissa hamāre aañsū haiñ

inheñ bhī shauq-e-azīyyat pe vārte haiñ ham

hamārī aañkh se nīñdeñ uḌāne lagtā hai

jise bhī ḳhvāb samajh kar pukārte haiñ ham

ham apne jism kī poshāk ko badalte haiñ

nayā ab aur koī ruup dhārte haiñ ham

thakan ka bojh badan se utarte hain hum

ye sham aur kahin par guzarte hain hum

qadam zamin pe rakkhe hamein zamana hua

so aasman se KHud ko utarte hain hum

hamari ruh ka hissa hamare aansu hain

inhen bhi shauq-e-aziyyat pe warte hain hum

hamari aankh se ninden uDane lagta hai

jise bhi KHwab samajh kar pukarte hain hum

hum apne jism ki poshak ko badalte hain

naya ab aur koi rup dhaarte hain hum