thakan ki talKHiyon ko armughan anmol deti hai

thakan kī talḳhiyoñ ko armuġhāñ anmol detī hai

tirī bolī mirī chaa.e meñ chīnī ghol detī hai

na jaane muntazir kis kī hai ik nādān sī laḌkī

koī aahaT jo suntī hai darīcha khol detī hai

kahāñ kāñTe bichhe hoñge kidhar se ā.eñge patthar

mirī maañ ḳhvāb meñ aa kar mujhe sab bol detī hai

kahīñ par baiTh kar sunsān rasta shaam tak dekho

mohabbat apne Darāme meñ yahī ik rol detī hai

ye tanhā raat rātoñ ke alāva kuchh nahīñ detī

magar kuchh haath meñ detī hai to anmol detī hai

kabhī fāqa-kashī kā ġham na chhat kī fikr hai lekin

ġharībī beTiyoñ kā pahle zevar mol detī hai

kabhī darvesh ban jaao to mil jaa.e shahanshāhī

kabhī to bādshāhat haath meñ kashkol detī hai

hamāre gaañv ke khetoñ meñ 'sāgar' phuul khilte haiñ

vo miTTī aur hogī jo tumheñ pistol detī hai

thakan ki talKHiyon ko armughan anmol deti hai

teri boli meri chae mein chini ghol deti hai

na jaane muntazir kis ki hai ek nadan si laDki

koi aahaT jo sunti hai daricha khol deti hai

kahan kanTe bichhe honge kidhar se aaenge patthar

meri man KHwab mein aa kar mujhe sab bol deti hai

kahin par baiTh kar sunsan rasta sham tak dekho

mohabbat apne Darame mein yahi ek rol deti hai

ye tanha raat raaton ke alawa kuchh nahin deti

magar kuchh hath mein deti hai to anmol deti hai

kabhi faqa-kashi ka gham na chhat ki fikr hai lekin

gharibi beTiyon ka pahle zewar mol deti hai

kabhi darwesh ban jao to mil jae shahanshahi

kabhi to baadshahat hath mein kashkol deti hai

hamare ganw ke kheton mein 'sagar' phul khilte hain

wo miTTi aur hogi jo tumhein pistol deti hai