tham zara waqt-e-ajal didar-e-jaan hone laga

tham zarā vaqt-e-ajal dīdār-e-jāñ hone lagā

āḳhirī hichkī pe koī mehrbāñ hone lagā

kis sitamgar ne uḌā lī yād-e-māzī kī bayāz

har galī har moḌ par qissa bayāñ hone lagā

jaane kis gul ne chaman kī hurmateñ pāmāl kiiñ

mausam-e-fasl-e-bahārāñ bhī ḳhizāñ hone lagā

dafn kar ke qabr meñ jab jā chuke ahbāb dost

jo kabhī sochā na thā vo imtihāñ hone lagā

dast-o-pā shal ho ga.e haiñ quvvateñ zaa.il huiiñ

zindagānī kā safar aage ravāñ hone lagā

ḳhvāhishoñ kī chaah meñ ḳhusrān ke saude kiye

manfa.at samjhā jise āḳhir ziyāñ hone lagā

koī va.ada aaj tak iifā nahīñ tum ne kiyā

baat sachchī thī magar vo bad-gumāñ hone lagā

paañv kī aahaT ne mujh ko gor meñ chauñkā diyā

hichkiyoñ kā saaz dil kā tarjumāñ hone lagā

kaisī ḳhush-fahmī tumheñ kis baat kā ġharra 'umīd'

aa ga.e haiñ aqrabā vaqt-e-azāñ hone lagā

tham zara waqt-e-ajal didar-e-jaan hone laga

aaKHiri hichki pe koi mehrban hone laga

kis sitamgar ne uDa li yaad-e-mazi ki bayaz

har gali har moD par qissa bayan hone laga

jaane kis gul ne chaman ki hurmaten pamal kin

mausam-e-fasl-e-bahaaran bhi KHizan hone laga

dafn kar ke qabr mein jab ja chuke ahbab dost

jo kabhi socha na tha wo imtihan hone laga

dast-o-pa shal ho gae hain quwwaten zail huin

zindagani ka safar aage rawan hone laga

KHwahishon ki chah mein KHusran ke saude kiye

manfat samjha jise aaKHir ziyan hone laga

koi wada aaj tak ifa nahin tum ne kiya

baat sachchi thi magar wo bad-guman hone laga

panw ki aahaT ne mujh ko gor mein chaunka diya

hichkiyon ka saz dil ka tarjuman hone laga

kaisi KHush-fahmi tumhein kis baat ka gharra 'umid'

aa gae hain aqraba waqt-e-azan hone laga