the kabhi hum ko bhi hangame aziz

the kabhī ham ko bhī hangāme 'azīz

ab magar lagte haiñ sannāTe 'azīz

jo hameñ haiñ jaan ke jaise 'azīz

kaash hote ham bhī yuuñ un ke 'azīz

zindagī mahfūz ho jin ke tale

kis qadar hote haiñ vo saa.e 'azīz

jin se haiñ mansūb yādeñ aap kī

ham ko haiñ vo sab galī kūche 'azīz

zindagī kaTtī nahīñ un ke binā

log kuchh hote haiñ kyoñ itne 'azīz

dil ko chhū jaate the jo bhītar talak

aaj bhī haiñ ham ko vo naġhme 'azīz

jaam ḳhushiyoñ ke mubārak aap ko

ham ko to haiñ ġham ke paimāne 'azīz

ahl-e-duniyā ko haiñ pyārī manzileñ

aur 'madhuman' ham ko haiñ raste 'azīz

the kabhi hum ko bhi hangame 'aziz

ab magar lagte hain sannaTe 'aziz

jo hamein hain jaan ke jaise 'aziz

kash hote hum bhi yun un ke 'aziz

zindagi mahfuz ho jin ke tale

kis qadar hote hain wo sae 'aziz

jin se hain mansub yaaden aap ki

hum ko hain wo sab gali kuche 'aziz

zindagi kaTti nahin un ke bina

log kuchh hote hain kyon itne 'aziz

dil ko chhu jate the jo bhitar talak

aaj bhi hain hum ko wo naghme 'aziz

jam KHushiyon ke mubarak aap ko

hum ko to hain gham ke paimane 'aziz

ahl-e-duniya ko hain pyari manzilen

aur 'madhuman' hum ko hain raste 'aziz