thi dhup tez is qadar badan bhi jaise jal gaya

thī dhuup tez is qadar badan bhī jaise jal gayā

magar baḌhā jo merā qad to āftāb Dhal gayā

jab us galī meñ jhuuT kī sunīñ fareb-kāriyāñ

to us galī meñ sach sunā aur aage maiñ nikal gayā

jo merā naam aa gayā vo muskurā ke rah gayā

raqīb kī ḳhushāmadoñ kā zor us pe chal gayā

yahāñ har ek samt haiñ latāfateñ nafāsateñ

kahīñ ye dil Thahar gayā kahīñ ye dil machal gayā

ye rahne vaalā shahr kā yaqīñ na kar sakā kabhī

vo rahne vaalā gaaoñ kā ki jhuuT se bahal gayā

thī mere paas raushnī to vo bhī mere saath thā

añdherā jab huā to vo kahāñ se kab nikal gayā

mujhe nahīñ hai is kā ġham ki muflisī milī mujhe

mujhe ye ġham satā rahā hai us kā kaam chal gayā

hameñ 'niyāzī' aaj bhī tirī vo baat yaad hai

jo gir gayā so gir gayā jo uTh gayā sañbhal gayā

thi dhup tez is qadar badan bhi jaise jal gaya

magar baDha jo mera qad to aaftab Dhal gaya

jab us gali mein jhuT ki sunin fareb-kariyan

to us gali mein sach suna aur aage main nikal gaya

jo mera nam aa gaya wo muskura ke rah gaya

raqib ki KHushamadon ka zor us pe chal gaya

yahan har ek samt hain latafaten nafasaten

kahin ye dil Thahar gaya kahin ye dil machal gaya

ye rahne wala shahr ka yaqin na kar saka kabhi

wo rahne wala gaon ka ki jhuT se bahal gaya

thi mere pas raushni to wo bhi mere sath tha

andhera jab hua to wo kahan se kab nikal gaya

mujhe nahin hai is ka gham ki muflisi mili mujhe

mujhe ye gham sata raha hai us ka kaam chal gaya

hamein 'niyazi' aaj bhi teri wo baat yaad hai

jo gir gaya so gir gaya jo uTh gaya sanbhal gaya