thi ham-aghoshi magar kuchh bhi mujhe hasil na tha

thī ham-āġhoshī magar kuchh bhī mujhe hāsil na thā

vo ik aisā lams thā jis meñ badan shāmil na thā

ret kī daldal milī mujh ko samundar paar bhī

maiñ vahāñ utrā jahāñ sāhil kabhī sāhil na thā

vo to ik sāzish thī mere ḳhuun kī mere ḳhilāf

jis ke sar ilzām aayā vo mirā qātil na thā

ham ne kaaTe peḌ to sāyoñ kī yaad aane lagī

lekin ab harf-e-nadāmat se bhī kuchh hāsil na thā

sar pe aa girtā hai takmīl-e-mohabbat kā pahāḌ

varna iz.hār-e-tamannā to koī mushkil na thā

par lagā kar uḌ ga.e āḳhir mirī nīñdoñ ke saath

pyaar ke vo ḳhvāb jin kā koī mustaqbil na thā

un se mil kar ye bhī dekhī sho.abada-bāzī 'qatīl'

dhaḌkaneñ maujūd thiiñ siine meñ lekin dil na thā

thi ham-aghoshi magar kuchh bhi mujhe hasil na tha

wo ek aisa lams tha jis mein badan shamil na tha

ret ki daldal mili mujh ko samundar par bhi

main wahan utra jahan sahil kabhi sahil na tha

wo to ek sazish thi mere KHun ki mere KHilaf

jis ke sar ilzam aaya wo mera qatil na tha

hum ne kaTe peD to sayon ki yaad aane lagi

lekin ab harf-e-nadamat se bhi kuchh hasil na tha

sar pe aa girta hai takmil-e-mohabbat ka pahaD

warna izhaar-e-tamanna to koi mushkil na tha

par laga kar uD gae aaKHir meri nindon ke sath

pyar ke wo KHwab jin ka koi mustaqbil na tha

un se mil kar ye bhi dekhi shoabada-bazi 'qatil'

dhaDkanen maujud thin sine mein lekin dil na tha