thoDi si waza oDh li aur waza-dar ho gae

thoḌī sī vaz.a oḌh lī aur vaz.a-dār ho ga.e

ashāb-e-izz-o-jāh meñ ham bhī shumār ho ga.e

ham bhī chaTTān the magar zarb-e-shadīd vaqt se

har lamha TūTte rahe āḳhir ġhubār ho ga.e

tarkash meñ jis ke tiir the na haath meñ kamān thī

shūmī-e-baḳht dekhte us kā shikār ho ga.e

manDī meñ le to aa.e ho lekin vo bik na pā.eñge

mausam-e kī maar se jo phuul dāġhdār ho ga.e

sharm-o-hayā adab ke jo the kuchh libās-e-fāḳhira

ghar meñ rakhe rakhe hī vo taar taar ho ga.e

sab ke huqūq kuchh na kuchh haiñ qarz merī zaat par

kaise chukā.ūñgā vahāñ itne udhār ho ga.e

thoDi si waza oDh li aur waza-dar ho gae

ashab-e-izz-o-jah mein hum bhi shumar ho gae

hum bhi chaTTan the magar zarb-e-shadid waqt se

har lamha TuTte rahe aaKHir ghubar ho gae

tarkash mein jis ke tir the na hath mein kaman thi

shumi-e-baKHt dekhte us ka shikar ho gae

manDi mein le to aae ho lekin wo bik na paenge

mausam-e ki mar se jo phul daghdar ho gae

sharm-o-haya adab ke jo the kuchh libas-e-faKHira

ghar mein rakhe rakhe hi wo tar tar ho gae

sab ke huquq kuchh na kuchh hain qarz meri zat par

kaise chukaunga wahan itne udhaar ho gae